Andijon viloyatida xalq deputatlari viloyat Kengashining navbatdan tashqari sessiyasida Davlat rahbarining hududlarda jinoyatchilikni jilovlash bilan bogʻliq topshiriqlarning ijrosi muhokama qilindi
2026-09-04 20:45:00 / Yangiliklar
Tadbirda viloyat hokimi Shuxratbek Abduraxmanov, Oʻzbekiston Respublikasi Prezidenti Administratsiyasining masʼullari, Ichki ishlar vazirligi mutasaddilari, xalq deputatlari Kengashi aʼzolari, shahar va tumanlar jamoatchilik faollari, shuningdek, huquqni muhofaza qiluvchi organlar rahbarlari ishtirok etdi.
Sessiya doirasida tashkiliy masala koʻrib chiqildi.
Ichki ishlar vazirining buyrugʻiga asosan, ilgari Xorazm viloyati Ichki ishlar boshqarmasi boshligʻi lavozimida xizmat qilgan polkovnik Shermuxamedov Abdumajid Mavlyanovich Andijon viloyati Ichki ishlar boshqarmasi boshligʻi etib tayinlandi.
Yigʻilish davomida Oʻzbekiston Respublikasi Prezidentining joriy yilda mahallalarda xavfsiz muhitni shakllantirish, huquqbuzarliklarni barvaqt aniqlash va ularning oldini olish tizimini yanada takomillashtirishga qaratilgan qarori ijrosi yuzasidan amalga oshirilgan ishlar atroflicha va tanqidiy tahlil qilindi. Sohaga oid belgilangan vazifalarning bajarilishiga ham alohida eʼtibor qaratildi.
Hududdagi kriminogen holat tahlili asosida vaziyatni yanada yaxshilash maqsadida yangi tayinlangan rahbar zimmasiga jinoyatchilikni jilovlash, mahallalarda xavfsiz muhitni mustahkamlash, aholi murojaatlari bilan manzilli ishlash, fuqarolar roziligini taʼminlash, shuningdek, mavjud muammolarni aniqlab, ularni tizimli hal etishga qaratilgan aniq vazifalar yuklatildi. Shu bilan birga, shahar va tuman IIB rahbarlariga ushbu yoʻnalishlardagi profilaktik va amaliy ishlar samaradorligini oshirish boʻyicha tegishli topshiriqlar berildi.
Sessiya yakunida muhokama etilgan masalalar yuzasidan masʼul xodimlar va soha mutaxassislarining taklif-mulohazalari tinglanib, mavjud muammolarni bartaraf etish hamda belgilangan vazifalarni izchil amalga oshirish boʻyicha keyingi ustuvor chora-tadbirlar belgilab olindi.