O‘zbеkiston Rеspublikаsi Ichki ishlаr vаzirligi

2026-yil 26-avgust kuni qabul qilingan “Ichki ishlar organlari uchun professional kadrlarni tayyorlash tizimini transformatsiya qilish chora-tadbirlari toʻgʻrisida”gi Prezident qarori — PQ–303-son hujjat ichki ishlar organlari uchun kadrlar tayyorlash tizimini sifat jihatidan yangi bosqichga olib chiqishga qaratilgan muhim qadam boʻldi.

Mazkur qarorning mazmun-mohiyati, unda belgilangan ustuvor vazifalar va ularning amaliyotdagi ahamiyatiga bagʻishlangan yigʻilish oʻtkazildi.

Unda Prezident Administratsiyasining masʼul xodimlari, ichki ishlar vaziri oʻrinbosarlari, Ichki ishlar vazirligi Akademiyasi rahbariyati, professor-oʻqituvchilari hamda masʼul xodimlar ishtirok etdi.

Yigʻilishda taʼkidlanganidek, yangi qaror bilan ichki ishlar organlari uchun professional kadrlarni tayyorlashning yagona, uzluksiz va zamonaviy tizimini shakllantirish maqsad qilingan.

Jumladan, Akademiyada “School” tizimi joriy etilib, taʼlim jarayoni ilgʻor xorijiy tajriba hamda dunyoning yetakchi universitetlari amaliyoti asosida bosqichma-bosqich takomillashtiriladi. Taʼlimning kredit-modul tizimiga oʻtilishi, zamonaviy axborot texnologiyalari va sunʼiy intellekt yoʻnalishlarini kuchaytirish, kursantlarni 1-kursdan boshlab amaliyotga yaqinlashtirishga alohida eʼtibor qaratiladi.

Eʼtiborli jihati, 2026–2030 — taʼlim, texnologiya, innovatsiya va sunʼiy intellekt boʻyicha maslahatchi faoliyati yoʻlga qoʻyiladi. Shuningdek, har yili 50 nafar professor-oʻqituvchi “Yangi Oʻzbekiston” universitetida, 30 nafari esa xorijiy taʼlim tashkilotlarida stajirovka oʻtaydi.

Bundan tashqari, 2027/2028-oʻquv yilidan Ichki ishlar vazirligining idoralararo texnikumlari tashkil etilib, kasbiy taʼlim va Akademiya taʼlimini oʻzaro integratsiya qilishning yangi mexanizmi yoʻlga qoʻyiladi.

Kadrlarning keyingi kasbiy rivojlanishini taʼminlash maqsadida malaka oshirish tizimi ham takomillashtiriladi. Hududiy oʻquv markazlari faoliyati kengaytirilib, xodimlarni xizmat joyidan uzoqlashtirmagan holda mobil kasbiy malaka oshirish kurslari tashkil etiladi.

Yigʻilishda mazkur yangiliklarni amaliyotga samarali tatbiq etish, belgilangan vazifalarni oʻz vaqtida va sifatli bajarish masalalariga alohida urgʻu berildi.

Shu munosabat bilan qarorda belgilangan vazifalarni chuqur oʻrganish, ularni masʼul ijrochilar kesimida aniq belgilash, ijroni tizimli nazoratga olish hamda taʼlim jarayonini zamonaviy talablar asosida tashkil etish boʻyicha aniq vazifa va topshiriqlar berildi.

Xususan, Akademiyada taʼlim sifatini oshirish, ilgʻor pedagogik va raqamli texnologiyalarni keng joriy etish, professor-oʻqituvchilarning kasbiy salohiyatini yuksaltirish, taʼlimni amaliyot bilan uzviy bogʻlash hamda qarorda belgilangan yangi mexanizmlarni belgilangan muddatlarda toʻliq ishga tushirish boʻyicha masʼullarga tegishli koʻrsatmalar berildi.

Zero, zamonaviy ichki ishlar organi uchun zamonaviy bilim va yuksak kasbiy salohiyatga ega xodim zarur. PQ–303-son qaror ana shu maqsad yoʻlida kadrlar tayyorlash, ularning kasbiy rivojlanishi va xizmatdagi samaradorligini taʼminlashning yaxlit tizimini yaratishga xizmat qiladi.

Yangi yondashuvning asosiy maqsadi — maktab → akademik litsey → idoralararo texnikum → IIV Akademiyasi → amaliyot → malaka oshirish → kasbiy oʻsish va karyera tamoyili asosida ichki ishlar organlari uchun professional kadrlarni tayyorlashning uzluksiz tizimini shakllantirishdir.