O‘zbеkiston Rеspublikаsi Ichki ishlаr vаzirligi

Bugun dunyo shiddat bilan oʻzgarayotgan, taraqqiyot va raqobat mezonlari tobora yangilanib borayotgan bir davrda har qanday davlatning ertangi taqdiri, avvalo, uning qanday avlodni tarbiyalayotgani bilan belgilanadi. Zero, zamonaviy bilim va yuksak tafakkurga ega, Vatan taqdiriga daxldorlik tuygʻusi bilan yashaydigan yoshlar bor ekan, taraqqiyotning mustahkam poydevori hamisha mavjud boʻladi.

2-sentyabr — Bilimlar kuni ham ana shu ezgu maqsadlarni oʻzida mujassam etgan, millionlab oʻquvchilar qalbida yangi orzu va intilishlarga yoʻl ochadigan ayyomdir. Bu kun maktab ostonasiga qadam qoʻygan har bir bola uchun yangi bilimlar, yangi imkoniyatlar va yangi maqsadlar sari boshlanadigan safarning ibtidosidir.

Ayniqsa, qalbida Vatan mehri joʻsh urgan, ajdodlari qoldirgan boy maʼnaviy merosdan kuch olib, yurt tinchligi va taraqqiyotiga munosib hissa qoʻshishni maqsad qilgan oʻgʻil-qizlar — mamlakatimizning eng katta boyligi va ertangi kun bunyodkorlaridir.

Bunday yoshlarni tarbiyalash esa taʼlim tizimi oldida turgan eng masʼuliyatli vazifalardan biridir.

Ichki ishlar vazirligi Ixtisoslashtirilgan maktab-internatida amalga oshirilayotgan ishlar zamirida ham ana shu yuksak maqsad mujassam.

Istiqlolimizning 35-yillik shodiyonalari davom etayotgan ayni kunlarda bilim maskanida yana bir muhim inshoot — 500 oʻrinli zamonaviy yotoqxona binosi foydalanishga topshirildi.

Yangi oʻquv yili boshlanishi munosabati bilan tashkil etilgan tadbirda Oʻzbekiston Respublikasi ichki ishlar vaziri, general-leytenant Aziz Tashpulatov ishtirok etib, maktab-internatida oʻquvchilar uchun yaratilgan sharoitlar, taʼlim jarayoniga tayyorgarlik va muassasada amalga oshirilayotgan yangilanishlar bilan yaqindan tanishdi.

Oʻquv binosida matematika, rus tili, sunʼiy intellekt va ingliz tili fanlari boʻyicha zamonaviy sinf xonalari yangi oʻquv yiliga shay holatga keltirilgan. Demak, bilimlar kunidan boshlab bu yerda nafaqat anʼanaviy fanlar, balki bugungi kun va kelajak kasblari uchun muhim boʻlgan yangi yoʻnalishlar boʻyicha ham qizgʻin mashgʻulotlar boshlanadi.

Tadbir ishtirokchilari yangi qurilgan 500 oʻrinli yotoqxona binosi bilan tanishdilar. Bu inshoot oʻquvchilarning dam olishi va yashashi uchun sharoit yaratish bilan birga, ularning shaxsiy va jamoaviy fazilatlarini shakllantirishga ham alohida eʼtibor qaratilgan.

Psixologik trening va relaksatsiya xonalari, mashgʻulot zali, oʻquv-metodik va maʼnaviyat xonalari, tibbiy punkt hamda axborot-resurs markazining tashkil etilgani taʼlim jarayoniga kompleks yondashuvning amaliy ifodasidir. Bu yerda har bir jihat — oʻquvchining ruhiy xotirjamligi, jismoniy chiniqishi, sogʻlom muhitda kamol topishi, boʻsh vaqtini mazmunli oʻtkazishi va oʻz ustida ishlashiga xizmat qiladi.

Ayniqsa, ichki ishlar organlari uchun kelajak kadrlarini tayyorlashda bu jihatlar muhim ahamiyat kasb etadi. Chunki bugun maktab partasida oʻtirgan oʻquvchi ertaga jamoat xavfsizligini taʼminlash, inson huquq va erkinliklarini himoya qilish, Vatan tinchligiga daxldor masʼuliyatli vazifalarni bajarishi mumkin.

Shu boisdan ham yoshlarga hozirdanoq ichki ishlar organlari xodimi kasbining masʼuliyatini anglatish, ularda intizom, jamoa bilan ishlash, qatʼiyat, jasorat va fidoyilik kabi fazilatlarni shakllantirish muhim.

Maktab-internati hududida yangidan tashkil etilgan futbol stadioni, vorkaut va voleybol maydonlari ham ana shu maqsadlarga xizmat qiladi. Zero, zamonaviy ichki ishlar xodimi faqat bilimli emas, balki jismonan baquvvat, ruhan barqaror, tezkor fikrlaydigan va murakkab vaziyatlarda toʻgʻri qaror qabul qila oladigan shaxs boʻlishi kerak.

Tadbir davomida ichki ishlar vaziri oʻquvchilarning sport bilan muntazam shugʻullanishiga, ularning jismoniy tayyorgarligini yanada kuchaytirishga alohida eʼtibor qaratdi. Bu borada malakali murabbiy va pedagoglar, psixologlarni taʼlim jarayoniga keng jalb etish boʻyicha masʼullarga tegishli vazifalar belgilandi.

Bugun bilimlar kuni munosabati bilan ushbu dargoh ostonasiga qadam qoʻyayotgan oʻquvchilar yangi oʻquv yilini mana shunday zamonaviy va keng imkoniyatlarga ega taʼlim maskanida boshlamoqda.

Zero, bilimli avlod — qudratli davlat tayanchi. Tafakkurli avlod — taraqqiyot kafolati. Vatanparvar avlod esa yurtning eng ishonchli posbonidir. Yangi Oʻzbekistonning ertangi kuni esa ana shu bilimli va vatanparvar avlod qoʻlidadir.