Qashqadaryo viloyatida ichki ishlar organlari xodimi va uning oilasi uchun munosib yashash sharoitlari yaratildi
2026-09-01 12:10:00 / Yangiliklar
Ichki ishlar organlarida xizmat qilayotgan xodimlarni har tomonlama qoʻllab-quvvatlash, ularning ijtimoiy-maishiy sharoitlarini yaxshilash hamda oilalari farovonligini taʼminlashga alohida eʼtibor qaratilmoqda.
Ana shunday ezgu tashabbuslardan biri Qashqadaryo viloyati IIB JXX YHXB xodimi, safdor Hoshimjon Malikovning yashash xonadonida amalga oshirildi.
YHXB rahbariyatining tashabbusi bilan xodimning yashash xonadoni qayta qurilib, zamonaviy talablar asosida taʼmirlash ishlari olib borildi. Xonadonning yashash uchun qulay va shinam sharoitga keltirilishi xodim va uning oila aʼzolari uchun katta quvonch boʻldi.
Mazkur ishlarning asosiy maqsadi — xizmat vazifalarini sidqidildan bajarib kelayotgan xodimni ijtimoiy jihatdan qoʻllab-quvvatlash, uning yashash sharoitlarini yaxshilash va oilasiga munosib sharoit yaratishdan iborat.
Taʼkidlash joizki, ichki ishlar organlari tizimida xodimlarning ijtimoiy himoyasini kuchaytirish, ularning muammolarini oʻrganish va amaliy yordam koʻrsatish borasidagi ishlar izchil davom ettirilmoqda. Zero, xodim oʻzining va oilasining ijtimoiy himoyalanganini his qilgan holda xizmat vazifalarini yanada masʼuliyat va fidoyilik bilan bajaradi.
Bunday ezgu tashabbuslar xodimlarga boʻlgan eʼtibor va gʻamxoʻrlikning yorqin namunasi boʻlib, ichki ishlar organlarida inson qadri, xodim manfaatlari va uning oilasi farovonligi ustuvor ekanini yana bir bor namoyon etadi.
Xodimga koʻrsatilayotgan bunday eʼtibor — uning xizmatiga berilgan yuksak baho, oilasiga esa amaliy koʻmak va gʻamxoʻrlik ifodasidir.
Qashqadaryo viloyati IIB Axborot xizmati