Jamoat tartibini saqlash va xavfsizlikni taʼminlashda yangi imkoniyatlar — yuksak masʼuliyat va natijadorlik sari
2026-09-01 14:00:00 / Yangiliklar
Nurafshon bugun mamlakatimizning shiddat bilan rivojlanib, yangi qiyofa kasb etayotgan markazlaridan biriga aylanmoqda. Shahar deyarli toʻliq qayta qurilib, zamonaviy meʼmoriy yechimlar asosida yangi binolar, xizmat koʻrsatish va servis obyektlari, davlat va hokimiyat organlari uchun moʻljallangan inshootlar qad rostlamoqda. Yoʻl va transport infratuzilmasi ham zamonaviy talablar asosida takomillashtirilmoqda.
Toshkent viloyatida aholi xavfsizligini taʼminlash, huquqbuzarliklarning oldini olish va jinoyatchilikka qarshi kurashish borasidagi chora-tadbirlarni muvofiqlashtirishda ham Nurafshon shahri alohida ahamiyat kasb etadi.
Mustaqilligimizning 35-yilligi munosabati bilan viloyat Ichki ishlar bosh boshqarmasi Tezkor vazifalarni bajaruvchi safarbarlik otryadi uchun barcha zarur sharoit va imkoniyatlarga ega boʻlgan yangi bino foydalanishga topshirildi.
Yangi inshootda yaratilgan zamonaviy sharoitlar tezkor tuzilmalar faoliyatini yanada takomillashtirish, ularning harakatchanligi va safarbarligini oshirish, yuzaga kelishi mumkin boʻlgan murakkab vaziyatlarga tezkor va samarali javob qaytarish imkonini beradi.
Tadbirda ishtirok etgan Ichki ishlar vaziri general-leytenant Aziz Tashpulatov otryadning tezkor xodimlarini tayyorlashda hududlarning oʻziga xos xususiyatlarini inobatga olish, mashgʻulotlarni shu asosda tashkil etish muhimligini taʼkidladi.
Shuningdek, zamonaviy tahdidlarga, xususan, kiberjinoyatchilik, uyushgan jinoyatchilik va narkolaboratoriyalar faoliyatiga qarshi kurashishda otryad imkoniyatlaridan unumli foydalanish, xodimlarning kasbiy va amaliy koʻnikmalarini muntazam ravishda oshirib borish zarurligi qayd etildi.
Zero, Yangi Oʻzbekiston ichki ishlar organi xodimi nafaqat jismonan baquvvat va aqlan salohiyatli, balki har qanday vaziyatda tezkor va toʻgʻri qaror qabul qila oladigan, psixologik bosimlarga xotirjamlik bilan bardosh beradigan, zamonaviy texnologiyalardan mohirona foydalana oladigan professional mutaxassis boʻlishi lozim.
Bu esa, avvalo, mustahkam va samarali tizimni shakllantirish, sohaga fidoyi va salohiyatli yoshlarni keng jalb etish, tajribali murabbiylar maktabini yaratish hamda zamonaviy talablarga javob beradigan professional tezkor xodimlarni tayyorlashni taqozo etadi.
Tezkor tuzilmalar faoliyatiga ana shu yondashuvlarni izchil va samarali tatbiq etish bugungi kunning muhim talablaridan biridir.
Tadbir ishtirokchilari yaratilgan yangi sharoit va imkoniyatlar bilan yaqindan tanishib, sohaga ilgʻor texnik ishlanmalarni joriy etish, xodimlarni tayyorlash va ularning kasbiy mahoratini oshirishda zamonaviy yondashuvlar yuzasidan fikr almashdilar. Yaqin istiqbolda amalga oshirilishi lozim boʻlgan muhim vazifalar belgilab olindi.
Chunki ichki ishlar organlari faoliyati samaradorligi, birinchi navbatda, binolarning koʻrkamligi yoki texnik jihozlarning zamonaviyligi bilan emas, balki ana shu imkoniyatlardan qay darajada oqilona va samarali foydalanilayotgani, xalqning roziligi hamda hududda tinchlik va osoyishtalikni taʼminlash borasida erishilayotgan aniq natijalar bilan baholanadi.
Yangi bino — yangi imkoniyat. Yangi imkoniyat esa — yanada yuksak masʼuliyat va natijadorlik demakdir.
Zero, mustaqilligimizning 35-yilligi shukuhi bilan uygʻunlashgan ushbu yangilanishning asl mazmuni ham bir haqiqatda mujassam: inson qadri ulugʻlangan yurtda uning tinchligi, huquq va erkinliklarini himoya qiladigan tizim ham zamonaviy, samarali va xalqchil boʻlishi shart.