Surxondaryo viloyatida Mustaqillik bayrami tadbirlari davomida jamoat xavfsizligi kuchaytirilgan tartibda taʼminlanmoqda
2026-08-30 09:00:00 / Yangiliklar
Surxondaryoda Oʻzbekiston Respublikasi Mustaqilligining 35-yilligi munosabati bilan oʻtkaziladigan bayram tantanalariga tayyorgarlik ishlari doirasida jamoat xavfsizligini taʼminlashga alohida eʼtibor qaratilmoqda.
Xususan, viloyatda asosiy bayram tadbirlari oʻtkaziladigan hududlarda xizmat olib boradigan huquqni muhofaza qiluvchi organlar xodimlari uchun xizmat oldidan yoʻriqnoma va koʻrsatmalar berildi.
Unda xodimlarga xizmatni belgilangan tartibda tashkil etish, fuqarolar xavfsizligini taʼminlash, hududga kirib-chiqish joylarida hushyorlikni oshirish, jamoat tartibini saqlash hamda turli koʻngilsiz holatlarning oldini olish boʻyicha zarur vazifalar tushuntirildi.
Shuningdek, bayram tadbirlari davomida fuqarolar bilan xushmuomalalik bilan muloqot qilish, xizmat intizomi va xavfsizlik talablariga qatʼiy rioya etish, yuzaga kelishi mumkin boʻlgan favqulodda vaziyatlarda tezkor va toʻgʻri harakat qilish boʻyicha tegishli tavsiyalar berildi.
Ichki ishlar organlari xodimlari Mustaqillik bayrami tantanalari yuqori saviyada, osoyishtalik va xavfsizlik muhitida oʻtishini taʼminlash uchun belgilangan vazifalarni masʼuliyat bilan bajarishga shay.
Surxondaryo viloyati IIB Axborot xizmati