Sirdaryo viloyati IIB rahbariyati tomonidan Guliston shahrida kriminogen vaziyatni barqarorlashtirish boʻyicha ustuvor vazifalar belgilandi
2026-08-30 09:00:00 / Yangiliklar
Sirdaryo viloyati ichki ishlar boshqarmasi boshligʻi, polkovnik Sardor Mirzaraimov rahbarligida Guliston shahrida kriminogen vaziyat barqarorligini taʼminlash, jinoyat va huquqbuzarliklarning barvaqt oldini olish masalalariga bagʻishlangan yigʻilish boʻlib oʻtdi.
Yigʻilishda avvalo viloyat hududidagi kriminogen vaziyat tahlil qilindi.Joriy yilning bugungi kuniga qadar sodir etilgan jinoyatlar, ularning kelib chiqish sabablari, shuningdek, ichki ishlar organlari tomonidan jinoyat va huquqbuzarliklarning barvaqt oldini olish borasida amalga oshirilgan ishlar tanqidiy-tahliliy ruhda muhokama etildi.
Shuningdek, jinoyatlarning sodir etilishiga imkon berayotgan omillarni aniqlash va bartaraf etish, muammoli hududlarda manzilli profilaktik tadbirlarni tashkil etish, aholi bilan ishlash samaradorligini oshirish masalalariga alohida eʼtibor qaratildi.
Yigʻilish davomida viloyat ichki ishlar boshqarmasi boshligʻi tomonidan masʼul rahbarlarga Guliston shahrida jinoyat va huquqbuzarliklarning oldini olish hamda jamoat va yoʻl harakati xavfsizligini taʼminlash borasida samarali ish usullarini joriy etgan holda “Guliston tajribasi”ni ishlab chiqish va uni amaliyotga tatbiq etish vazifasi topshirildi.
Bunda hududlardagi mavjud kriminogen vaziyatni chuqur oʻrganish, har bir mahalla kesimida muammolarni aniqlash, ularni manzilli hal etish, jinoyatlarning barvaqt oldini olishga qaratilgan tadbirlarni kuchaytirish muhimligi taʼkidlandi.
Yigʻilish yakunida masʼul rahbarlarga belgilangan vazifalarning ijrosini tizimli tashkil etish, amalga oshirilayotgan ishlarni doimiy tahlil qilib borish hamda kriminogen vaziyat barqarorligini taʼminlash borasida aniq natijalarga erishish yuzasidan tegishli koʻrsatmalar berildi.
Sirdaryo viloyati IIB Axborot xizmati