Buxoro viloyati IIBda jinoyatchilik tahlili, Mustaqillik bayramiga tayyorgarlik va qonunchilikdagi yangiliklar muhokama qilindi
2026-08-29 08:20:00 / Yangiliklar
Buxoro viloyati IIB boshligʻi huzurida oʻtgan davr mobaynida sodir etilgan jinoyatchilik holatlari, fuqarolar murojaatlari va qidiruvdagi shaxslar masalalariga bagʻishlangan yigʻilish boʻlib oʻtdi. Unda jinoyatlarning oldini olishga asosiy eʼtibor qaratilib, Buxoro shahridagi “S.Boharziy“ mahallasi tajribasini butun viloyat boʻylab ommalashtirish yuzasidan koʻrsatmalar berildi. Mulkiy jinoyatlar profilaktikasi esa tanqidiy baholandi.
Mustaqillik bayrami va “Bilimlar kuni“ oldidan taʼlim muassasalarida xavfsizlikni taʼminlash, maktablarni toʻliq kameralashtirish hamda “Telefonsiz maktab“ loyihasini tajriba-sinovdan oʻtkazish vazifalari belgilandi. Shuningdek, kiberjinoyatlarning oldini olish maqsadida “Buxoro smart qalqon“ dasturini keng targʻib qilish yuzasidan aniq topshiriqlar berildi.
Yigʻilishning ikkinchi qismida Oʻzbekiston Respublikasi Prezidenti Administratsiyasi toʻgʻrisidagi yangi qonun mazmun-mohiyati tushuntirildi.
Yigʻilish yakunida, barcha sohaviy xizmat rahbarlariga oʻz yoʻnalishlari boʻyicha aniq topshiriqlar berildi.
Buxoro viloyati IIB Axborot xizmati