Qashqadaryo viloyati Koʻkdala tumanida profilaktika inspektoriga zamonaviy uy-joy topshirildi
2026-08-28 20:25:00 / Yangiliklar
Prezident Shavkat Mirziyoyev joriy yil 29-iyun kuni joylarda jamoat xavfsizligini taʼminlash faoliyatini takomillashtirish, sohada kadrlar tayyorlash tizimini rivojlantirish yuzasidan taqdim etilgan takliflar bilan tanishish chogʻida profilaktika inspektorlarining ijtimoiy-huquqiy himoyasini kuchaytirish masalasiga alohida eʼtibor qaratgan edi.
Xususan, qonun loyihasida hokimliklarga profilaktika inspektorlarini xizmat xonasi hamda uy-joy bilan taʼminlash majburiyatini yuklash nazarda tutilganini taʼkidlagandi.
Shu munosabat bilan Koʻkdala tumanidagi “Oltin dala” mahallasida uy-joyga ehtiyoji boʻlgan mahalla profilaktika inspektori, katta leytenant Sarvar Qurbonov uchun qurib bitkazilgan, barcha sharoitlarga ega zamonaviy uy-joy topshirildi.
Tadbirda Qashqadaryo viloyati Ichki ishlar boshqarmasi boshligʻi, polkovnik Abduvohid Ismoilov, Koʻkdala tumani hokimi Xurram Joʻrayev, boshqarma Faxriylar kengashi vakillari, ommaviy axborot vositalari xodimlari, nuroniylar, huquqni muhofaza qiluvchi organlar rahbarlari va xodimlari hamda jamoatchilik vakillari ishtirok etdi.
Mahalla hududida joylashgan 4 xonali ushbu uy-joy 6 sotix yer maydonida qurilgan boʻlib, zamonaviy va qulay sharoitlar bilan taʼminlangan. Xonadon quyosh panellari, mebellar va zarur maishiy texnika vositalari bilan toʻliq jihozlangan.
Ushbu xonadonning foydalanishga topshirilishi mahalla profilaktika inspektorining jamoat tartibini saqlash, fuqarolar xavfsizligini taʼminlash, huquqbuzarliklar va jinoyatlarning oldini olish hamda sodir etilgan jinoyatlarni fosh etish borasida samarali va fidokorona xizmat qilishiga zamin yaratadi.
Bunday ijobiy ishlar muhtaram Prezidentimizning ichki ishlar organlari xodimlariga boʻlgan gʻamxoʻrligining yana bir amaliy ifodasi boʻldi.
Qashqadaryo viloyati IIB Axborot xizmati