Andijon viloyatida fuqaroligi tiklangan shaxsga Oʻzbekiston Respublikasi fuqarosining ID-kartasi tantanali ravishda topshirildi
2026-08-27 09:00:00 / Yangiliklar
Oʻzbekiston Respublikasida fuqarolik masalalari qonunchilikda belgilangan tartibda, inson huquq va manfaatlarini taʼminlash, fuqarolarning huquqiy maqomini aniqlash hamda ularni tegishli hujjatlar bilan taʼminlash tamoyillari asosida amalga oshirilmoqda.
Jumladan, 1960-yilda tugʻilgan Abdullayev Abdulaziz Tursunovichning Oʻzbekiston Respublikasi fuqaroligini tiklash masalasi ham amaldagi qonunchilik talablari asosida koʻrib chiqildi.
Fuqarolik masalasidagi huquqiy maqomini tiklash maqsadida fuqaro Abdullayev Abdulaziz Tursunovich Baliqchi tumani IIB Migratsiya va personallashtirish guruhiga murojaat qilib, zarur hujjatlarni belgilangan tartibda taqdim etdi.
Mazkur murojaat va unga ilova qilingan hujjatlar amaldagi qonunchilik talablari asosida atroflicha oʻrganilib, natijada Abdullayev Abdulaziz Tursunovichning Oʻzbekiston Respublikasi fuqaroligini tiklash toʻgʻrisida Oʻzbekiston Respublikasi Prezidentining 2026-yil 25-avgustdagi PF–170-sonli Farmoni qabul qilindi.
Shundan soʻng, mazkur Farmon asosida Abdullayev Abdulaziz Tursunovich nomiga Baliqchi tumani IIB Migratsiya va personallashtirish guruhi tomonidan Oʻzbekiston Respublikasi fuqarosining identifikatsiyalovchi ID-kartasi rasmiylashtirildi.
Ushbu muhim hujjat fuqaroga Andijon viloyati IIB boshligʻi ishtirokida tantanali ravishda topshirildi.
Taʼkidlash joizki, fuqarolikni tiklash — insonning davlat bilan huquqiy bogʻliqligini qayta tiklash, uning huquq va manfaatlarini toʻlaqonli amalga oshirishi uchun zarur huquqiy asoslarni yaratishda muhim ahamiyat kasb etadi.
Andijon viloyati IIB Axborot xizmati