Jizzax viloyati Sharof Rashidov tumanida qurilish va xodimlarni qoʻllab-quvvatlash ishlari oʻrganildi
2026-08-23 12:10:00 / Yangiliklar
Jizzax viloyati IIB boshligʻi tomonidan Sharof Rashidov tumanidagi Toqchilik mahallasida barpo etilayotgan huquq-tartibot maskani va mahalla fuqarolar yigʻini binosidagi qurilish ishlari, shuningdek, xodimlarni qoʻllab-quvvatlash doirasida amalga oshirilayotgan ishlar koʻzdan kechirildi.
Taʼkidlanganidek, oʻtgan yil avgust oyida boshlangan loyiha doirasida ikki qavatli binoda asosiy qurilish ishlari yakunlangan boʻlib, ayni paytda ichki-soʻnggi pardozlash hamda atrof hududni obodonlashtirish ishlari olib borilmoqda. Yangi binoda fuqarolarni qabul qilish va kutish joylari zamonaviy talablar asosida tashkil etilishi rejalashtirilgan. Mazkur obyektning foydalanishga topshirilishi mahallada profilaktik ishlarni samarali tashkil etish, aholi bilan muloqotni yanada yaqinlashtirish va huquqbuzarliklarning barvaqt oldini olish imkoniyatlarini kengaytiradi.
Shuningdek, viloyat IIB JXX YHXB xodimi, safdor Yodgor Rahmonov xonadonida hamkasblari ishtirokida hashar yoʻli bilan olib borilayotgan qurilish-taʼmirlash ishlari jarayoni ham oʻrganildi. Xodimlarni qoʻllab-quvvatlash va oʻzaro hamjihatlik anʼanalarini davom ettirish maqsadida amalga oshirilayotgan mazkur ishlar yuzasidan zarur qurilish materiallari bilan taʼminlash hamda hududni obodonlashtirish boʻyicha masʼullarga topshiriqlar berildi.
Oʻrganishlar yakunida qurilish-taʼmirlash ishlarini belgilangan muddatlarda va sifat talablari asosida yakunlash, hududlarni obodonlashtirish hamda belgilangan vazifalar ijrosini taʼminlash yuzasidan tegishli koʻrsatmalar berildi.
Jizzax viloyati IIB Axborot xizmati