Surxondaryoda xalq deputatlari viloyat Kengashining navbatdan tashqari sessiyasida ichki ishlar organlari oldidagi muhim vazifalar muhokama qilindi
2027-08-22 20:50:00 / Yangiliklar
Surxondaryo viloyatida jamoat xavfsizligini taʼminlash, hududdagi kriminogen vaziyatni yaxshilash hamda ichki ishlar organlari oldida turgan ustuvor vazifalar muhokamasiga bagʻishlangan xalq deputatlari viloyat Kengashining navbatdan tashqari sessiyasi boʻlib oʻtdi.
Unda Ichki ishlar vaziri general-leytenant Aziz Tashpulatov, viloyat hokimi Ulugʻbek Qosimov, xalq deputatlari Kengashi aʼzolari, mutasaddi idoralar rahbarlari, hamkor tashkilotlar masʼullari, shahar va tumanlar jamoatchilik faollari hamda huquqni muhofaza qiluvchi organlar rahbarlari ishtirok etdi.
Yigʻilish avvalida sessiya kun tartibidagi tashkiliy masala koʻrib chiqildi.
Ichki ishlar vazirining tegishli buyrugʻi asosida, Ichki ishlar vazirligi Akademiyasi magistratura bosqichi bitiruvchisi podpolkovnik Inoqov Baxtiyor Raximjonovich Surxondaryo viloyati Ichki ishlar boshqarmasi boshligʻi etib tayinlangani maʼlum qilindi.
Sessiyada hududdagi kriminogen vaziyat, jinoyatchilikni jilovlashga qaratilgan amaliy ishlar va mavjud muammolar chuqur tahlil qilinib, ularni bartaraf etishning amaliy choralari muhokama etildi. Shuningdek, Oʻzbekiston Respublikasi Prezidentining mahallalarda xavfsiz muhitni shakllantirish va profilaktika ishlarini kuchaytirishga doir qaror va topshiriqlaridan kelib chiqadigan vazifalar ijrosiga alohida eʼtibor qaratildi.
Xususan, joriy yilning hisobot davrida viloyatdagi 723 ta mahallaning 73 foizida yoki 528 tasida bironta ham jinoyat sodir etilmagani, xodimlarning tashabbuslari bilan aniqlanadigan jinoyatlarning soni 40 foizga yaxshilangani eʼtirof etilib, shu bilan birga 28 ta mahallalar “qizil” toifada qolayotganligi tanqid qilindi.
Yangi tayinlangan viloyat ichki ishlar boshqarmasi boshligʻiga jinoyatchilikka qarshi kurashish samaradorligini oshirish, har bir mahallada xavfsizlikni taʼminlash, aholi bilan yaqin muloqotni yoʻlga qoʻyish, murojaatlar ortidan yuzaga kelayotgan muammolarni chuqur oʻrganish va ularga yechim topish, fuqarolarning ichki ishlar organlariga ishonchini mustahkamlash boʻyicha qator muhim vazifalar yuklatildi.
Shu bilan birga, tuman va shahar ichki ishlar boʻlimlari rahbarlaridan jinoyat sodir etilishiga zamin yaratayotgan omillarni manzilli bartaraf qilish, mahallalar kesimida natijadorlikni oshirish talab etildi.
Sessiya yakunida bildirilgan fikr va takliflar umumlashtirilib, hududda osoyishtalikni mustahkamlash, jamoat tartibini saqlash va aholi xavfsizligini taʼminlashga qaratilgan navbatdagi chora-tadbirlar belgilab olindi.