Sirdaryo viloyatida xalq deputatlari viloyat Kengashining navbatdan tashqari sessiyasida hududda jinoyatchilikni jilovlash hamda kriminogen vaziyatni barqarorlashtirishga qaratilgan masalalar koʻrib chiqildi
2026-08-21 12:30:00 / Yangiliklar
Tadbirda viloyat hokimi, Prezident administratsiyasining masʼul xodimlari, xalq deputatlari Kengashi aʼzolari, shahar-tuman jamoatchilik faollari hamda huquqni muhofaza qiluvchi organlar rahbarlari qatnashdilar.
Sessiya kun tartibiga muvofiq tashkiliy masala koʻrildi.
Ichki ishlar vazirining buyrugʻi bilan ilgari Ichki ishlar vazirligi Tezkor-qidiruv departamenti boshligʻi oʻrinbosari — jinoyat qidiruv xizmati boshligʻi lavozimida xizmat qilgan polkovnik Mirzaraimov Sardor Taxirovich Sirdaryo viloyati Ichki ishlar boshqarmasi boshligʻi lavozimiga tayinlandi.
Majlisda Oʻzbekiston Respublikasi Prezidentining joriy yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini oshirishga qaratilgan qarori ijrosi hamda sohaga oid topshiriqlar yuzasidan amalga oshirilgan ishlar tanqidiy koʻrib chiqildi.
Viloyat hududida sodir etilayotgan jinoyatlar tahlilidan kelib chiqib, kriminogen vaziyatni yanada barqarorlashtirish maqsadida yangi tayinlangan rahbarga hududda jinoyatchilikni jilovlash, mahallalarni jinoyatchilikdan xoli hududlarga aylantirish, aholi murojaatlari bilan manzilli ishlash, fuqarolar roziligini taʼminlash hamda mavjud muammolarni aniqlab, ularni tizimli bartaraf etish boʻyicha aniq vazifalar belgilab berildi. Shuningdek, tuman-shahar IIB rahbarlariga mazkur yoʻnalishlardagi ishlarni kuchaytirish yuzasidan topshiriqlar berildi.
Sessiyada koʻtarilgan masalalar boʻyicha soha mutaxassislari tomonidan taklif va mulohazalar bildirilib, yechimini kutayotgan masalalar yuzasidan istiqbolli vazifalar belgilab olindi.