O‘zbеkiston Rеspublikаsi Ichki ishlаr vаzirligi

Ichki ishlar vazirligida huquqbuzarliklarning oldini olish, jamoat xavfsizligini taʼminlash va aholi osoyishtaligini mustahkamlash borasida Davlat rahbari tomonidan belgilangan vazifalar ijrosini taʼminlash masalalari muhokama qilindi.

Tadbirda Oʻzbekiston Respublikasi Prezidenti Administratsiyasi masʼullari, Vazirlar Mahkamasining mahalla va xotin-qizlar masalalari boʻyicha mutasaddilari, Ichki ishlar vaziri va sohaviy xizmat rahbarlari, Milliy gvardiya, Bosh prokuratura, Favqulodda vaziyatlar vazirligi rahbariyati hamda hududlarda hokimlar va jamoat xavfsizligini taʼminlash uchun masʼul rahbarlar videoselektor tarzida ishtirok etdilar.

Yigʻilishda Davlatimiz rahbarining tegishli qaror va topshiriqlarda belgilangan vazifalarning hududlarda amalga oshirilishi, huquqbuzarliklarning sabab va shart-sharoitlarini barvaqt aniqlash hamda ularni bartaraf etish, profilaktik ishlarni samarali tashkil etish masalalariga alohida eʼtibor qaratildi.

Shuningdek, huquqbuzarlik sodir etishga moyil shaxslar bilan manzilli profilaktik ishlarni kuchaytirish, mahallalarda xavfsiz muhitni shakllantirish, masʼul idoralar oʻrtasida hamkorlikni yanada mustahkamlash boʻyicha vazifalar belgilab olindi.

Muhokama davomida aniqlangan kamchiliklarni bartaraf etish, belgilangan chora-tadbirlarni sifatli va oʻz vaqtida amalga oshirish hamda ijro intizomini kuchaytirish yuzasidan masʼullarga tegishli koʻrsatmalar berildi.

Tadbirda tashkiliy masala koʻrib chiqildi.

Oʻzbekiston Respublikasi Prezidentining tegishli qarori bilan polkovnik Ismailov Timur Kamalitdinovich Oʻzbekiston Respublikasi Ichki ishlar vazirining birinchi oʻrinbosari — Jamoat xavfsizligi departamenti boshligʻi lavozimiga tayinlandi va shu munosabat bilan Surxondaryo viloyati IIB boshligʻi lavozimidan ozod etildi.

Lavozimga yangi tayinlangan rahbarga jamoat xavfsizligini taʼminlash, huquqbuzarliklar profilaktikasi va jinoyatchilikning barvaqt oldini olish tizimini yanada takomillashtirishga qaratilgan istiqbolli vazifalar yuklatildi.

Shuningdek, tizimni raqamlashtirish boʻyicha vazifalar ijrosini qatʼiy nazoratga olish, ichki ishlar organlarining boshqa davlat idoralari va jamoat tashkilotlari bilan hamkorligini kuchaytirish, jamoat tartibini saqlashning zamonaviy usullarini keng joriy etish, aholining huquqiy madaniyati va huquqni muhofaza qiluvchi organlarga ishonchini yanada oshirishga qaratilgan choralarni samarali tashkil etish talabi qoʻyildi.

Yigʻilish kun tartibiga koʻra mamlakatimiz hayotidagi muhim siyosiy-ijtimoiy voqealardan biri — Oʻzbekiston Respublikasi Davlat mustaqilligining 35-yilligi munosabati bilan oʻtkaziladigan bayram tadbirlarini yuqori saviyada, eng muhimi, aholi uchun xavfsiz va osoyishta sharoitda tashkil etish masalalari ham atroflicha muhokama qilindi.

Tadbirlar oʻtkaziladigan hududlarda jamoat tartibini saqlash, fuqarolar xavfsizligini taʼminlash, transport harakatini tartibga solish, odamlar gavjum joylarda huquqbuzarliklarning oldini olish hamda favqulodda holatlarning yuzaga kelish ehtimolini barvaqt bartaraf etish boʻyicha kompleks chora-tadbirlarni amalga oshirish zarurligi taʼkidlandi.

Ichki ishlar vaziri general-leytenant Aziz Tashpulatov jamoat xavfsizligini taʼminlashda har bir xizmatning vazifasi aniq belgilanishi, kuch va vositalar oldindan hisob-kitob qilinishi, masʼullar hududlardagi vaziyatni toʻliq nazorat qilishi lozimligini qayd etdi.

Shuningdek, tadbirlar davomida fuqarolarning murojaatlariga tezkor munosabat bildirish, yoʻl-transport harakati xavfsizligini taʼminlash, jamoat joylarida tartibni saqlash va profilaktik choralarni kuchaytirishga alohida eʼtibor qaratish vazifasi qoʻyildi.

Shu bilan birga, videoselektor orqali hududlardagi vaziyat ham tahlil qilinib, joylarda bayram tadbirlarini oʻtkazishga tayyorgarlik holati yuzasidan masʼul rahbarlarning axborotlari eshitildi.

Hudud rahbarlariga har bir tadbir oʻtkaziladigan manzil boʻyicha xavfsizlik choralarini, jalb etiladigan kuch va vositalarni qayta koʻrib chiqish, masʼul xodimlarni biriktirish, transport va piyodalar harakatini tartibga solish, taʼlim muassasalari atrofida xavfsiz muhitni taʼminlash, aniqlangan kamchiliklarni tadbirlar boshlanguniga qadar bartaraf etish boʻyicha aniq topshiriqlar berildi.

Eng muhimi, belgilangan chora-tadbirlar orqali fuqarolarning bayram kunlarini xotirjam oʻtkazishi, farzandlarning yangi oʻquv yilini xavfsiz va koʻtarinki ruhda boshlashi uchun zarur shart-sharoitlarni taʼminlash koʻzda tutilgan.