Qorovul qoʻshinlari qoʻmondoni 7536-harbiy qismdagi xizmat faoliyati va jangovar tayyorgarlik jarayonlarini koʻzdan kechirdi
2026-08-16 10:40:00 / Yangiliklar
Oʻzbekiston Respublikasi Ichki ishlar vazirligi Qorovul qoʻshinlari qoʻmondoni polkovnik X.A.Batirov 7536-harbiy qismga borib, shaxsiy tarkibning xizmat faoliyati va jangovar tayyorgarligini koʻzdan kechirdi.
Tashrif davomida qoʻriqlanadigan obyektlarda favqulodda vaziyatlar sodir boʻlganda idoralararo hamkorlikni taʼminlashga qaratilgan maxsus taktik oʻquv mashgʻulotlariga tayyorgarlik holati atroflicha oʻrganildi. Qoʻmondon mashgʻulotlarni tashkil etish, kuch va vositalarni samarali boshqarish hamda axborot almashinuvini yoʻlga qoʻyish yuzasidan masʼullar bilan muloqot qildi.
Shu bilan birga, harbiy xizmatchilar bilan yuzma-yuz suhbat oʻtkazilib, ularning qiziqtirgan masalalari va takliflari tinglandi. Xavfsizlikni taʼminlashda barcha masʼul tuzilmalarning birgalikdagi tezkor harakati hamda har bir xizmatchining yuksak maʼnaviy-ruhiy tayyorgarligi oʻta muhim ahamiyatga ega ekanligi tushuntirildi.
Tadbir yakunida masʼul rahbarlarga oʻquv jarayonlarini real holatlarga yaqinlashtirish va tayyorgarlikni yanada kuchaytirish boʻyicha aniq koʻrsatmalar berildi