IIV akademiyasida ichki ishlar va hamkor huquqni muhofaza qiluvchi tuzilmalarning psixolog-mutaxassislari uchun 2 bosqichdan iborat oʻquv kursi tashkil qilindi
2026-08-16 10:35:00 / Yangiliklar
Oʻquv kursi xodimlarning poligraf apparati yordamida maxsus psixofiziologik tekshiruvlarni samarali oʻtkazish boʻyicha bilim va amaliy koʻnikmalarini mustahkamlash, amaliyotga ilgʻor ish uslublarini joriy etish maqsadida tashkil qilindi.
Mashgʻulotlar davomida ishga qabul qilinayotgan nomzodning shaxsiy va kasbiy xususiyatlari bilan bogʻliq xavf omillarini baholash, xodimni lavozimga tayinlashda korrupsiya va boshqa illatlarga moyilligini aniqlash, jamoaviy muhitni mustahkamlash, xodimlarning psixologik-ruhiy holatini barqarorlashtirish, jinoyat protsessida shaxsning individual-psixologik xususiyatlari, motivatsiyasi va xatti-harakatlarini tahlil qilish kabi jihatlarga eʼtibor qaratildi.
Amaliy mashgʻulotlarda esa tinglovchilar poligraf tekshiruvlarini rejalashtirish, tekshiruvdan oldingi suhbatni tashkil etish, tekshiruv savollarini shakllantirish, poligraf apparatidan foydalanish, olingan psixofiziologik reaksiyalarni tahlil qilish va tekshiruv natijalarini umumlashtirish boʻyicha koʻnikmalarini mustahkamladilar.
Oʻquv kursi yakunida tinglovchilardan ogʻzaki va poligraf yordamida maxsus psixofiziologik tekshiruvlarni mustaqil bajarish orqali amaliy sinovlar qabul qilinib, undan muvaffaqiyatli oʻtganlarga sertifikatlar berildi.
IIV akademiyasi Axborot xizmati