Yangi avlod rahbarlari — yuksak ishonchga munosib, zamonaviy bilim va masʼuliyatga ega Yangi Oʻzbekiston ichki ishlar tizimining ishonchli tayanchi
2026-08-15 19:15:00 / Yangiliklar
Ichki ishlar vazirligi Akademiyasi magistratura bosqichini tamomlab yangi avlod kadrlari sifatida amaliyotga yoʻl olayotgan ofitserlar uchun bugun unutilmas kun. Oʻzbekiston Respublikasi Oliy Majlisi, Bosh prokuratura, Ichki ishlar va Mudofaa vazirliklari, Milliy gvardiya qoʻmondonligi vakillari, Akademiya professor-oʻqituvchilari qatnashgan tantanali tadbir bitiruvchilarning xizmat faoliyatidagi yangi bosqichni boshlab berdi.
Tadbirni ochib bergan Ichki ishlar vaziri general-leytenant Aziz Tashpulatov ichki ishlar organlari tizimini isloh qilish, faoliyat samaradorligini zamon talablariga mos ravishda takomillashtirib borish muhtaram Prezidentimizning doimiy eʼtiborlaridagi asosiy ustuvor yoʻnalishlardan biri boʻlib kelayotganligini eʼtirof etdi.
2022–2026-yillarda magistraturani 475 nafar tinglovchi tamomladi. Ulardan 109 nafari tashkiliy-strategik, 363 nafari tashkiliy-taktik boshqaruv, 3 nafari ilmiy-pedagogik faoliyat mutaxassisliklari boʻyicha tayyorlandi.
Taʼlim jarayoni toʻrtta modul asosida tashkil etildi: kadrlar bilan ishlash, jamoat xavfsizligi, tergov hamda tezkor-qidiruv faoliyatini tashkil etish va boshqarish.
Oʻquv rejasi “Axborot-tahlil faoliyatini tashkil etish”, “Boshqaruv faoliyati va rahbarlik sanʼati”, “Alohida sharoitlarda ichki ishlar organlarini boshqarish”, “Kuch va vositalarni boshqarish hamda muvofiqlashtirish”, “Ichki ishlar organlari faoliyatini raqamlashtirish va sunʼiy intellekt texnologiyalarini joriy etishni tashkil etish” kabi zamonaviy fanlar bilan boyitildi. Joriy yildan kiberxavfsizlik, elektron axborot tizimlari va taʼminlovchi boʻlinmalar faoliyatiga oid yangi fanlar ham joriy etildi.
Taʼlim jarayoniga ichki ishlar vaziri oʻrinbosarlari, sohaviy xizmatlar rahbarlari, davlat boshqaruvi organlari va yetakchi mutaxassislar jalb etildi. Strategik tahlil va istiqbolni belgilash oliy maktabi professorlari ishtirokida “Axborot-tahliliy faoliyat asoslari” yoʻnalishi boʻyicha maxsus kurslar tashkil qilinib, generallar va faxriylar ishtirokidagi “Ustozning shogirdga oʻgitlari“ master-klasslari rahbarlik tajribasini yosh avlodga yetkazishga xizmat qildi.
Raqamli boshqaruv koʻnikmalarini rivojlantirish maqsadida Inha universiteti, Muhammad al-Xorazmiy nomidagi Toshkent axborot texnologiyalari universiteti, Axborot-kommunikatsiya texnologiyalari va aloqa harbiy instituti hamda IT Parkda maxsus oʻquv kurslari tashkil etildi.
Amaliyot jarayonlari davomida ular Xitoy, Turkiya, Vengriya, Rossiya, Ozarbayjon va boshqa davlatlarga tajriba almashish uchun yuborildi.
Aynan Davlatimiz rahbarining qarori bilan Ichki ishlar vazirligi akademiyasida bakalavriat va magistraturani oʻz ichiga oluvchi ikki bosqichli oliy taʼlim tizimi joriy qilindi. Magistratura faoliyati “tashkiliy-strategik boshqaruv” “tashkiliy-taktik boshqaruv” mutaxassisliklari boʻyicha rahbar kadrlar hamda “ilmiy-pedagogik faoliyat” mutaxassisligi boʻyicha kadrlarni tayyorlashga qaratildi.
Albatta bu imkoniyatlarning barchasi oʻz salohiyati, bilimi va tajribasi, eng muhimi zamonaviy dunyoqarashi bilan yurtimiz tinchligi uchun, jamoat xavfsizligini taʼminlash, jinoyatchilikka qarshi kurashishda oʻziga xos maktab yarata oladigan Yangi Oʻzbekiston ichki ishlar organlarining salohiyatli rahbarlarini tayyorlash maqsadida tashkil etildi.
Shundan soʻng, magistraturani tamomlagan 95 nafar bitiruvchilar boʻyicha buyruq oʻqib eshittirildi va ularning har biriga diplom va koʻkrak nishonlari topshirildi.
Tantanali tadbirda bir safda tizilgan boʻlajak rahbarlar qalbidagi shijoat, ertangi kunga boʻlgan yuksak ishonch Akademiyada oʻzlashtirilgan zamonaviy bilimlar bilan birlashib, ularning salohiyatini yanada oshiradi.
Tadbirda soʻz olganlar bugun bitiruvchi sifatida diplom topshirilgan ofitserlar orasidan boʻlajak generallar, huquqni muhofaza qilish sohalarining rahbarlari, eng asosiysi vatanparvar ofitserlar yetishib chiqishiga ishonch bildirishdi.
Shu tariqa yuksak ishonch ortidan Akademiya professor-oʻqituvchilarning maslakdoshiga aylangan, ilgʻor chet el mamlakatlarida amaliyot oʻtagan, uzoq yillik tajribaga ega xodimlarning master-klasslarida koʻnikma orttirgan yosh rahbarlar, masʼuliyatli vazifaga kirishish uchun xizmat hududlariga yoʻl olishdi.