Buxoro viloyatida Mustaqillik bayramiga tayyorgarlik va jamoat xavfsizligini taʼminlash holati tumanlar kesimida oʻrganilmoqda
2026-08-13 12:20:00 / Yangiliklar
Buxoro viloyati Ichki ishlar boshqarmasi boshligʻi rahbarligidagi ishchi guruh tomonidan Oʻzbekiston Respublikasi Mustaqilligining 35 yillik bayram tadbirlariga tayyorgarlik koʻrish hamda jamoat xavfsizligini taʼminlash holati viloyatning barcha hududlarida izchil oʻrganilmoqda.
Oʻrganishlar Shofirkon, Peshku, Romitan, Olot, Qorakoʻl, Jondor, Kogon tumani, Kogon shahri hamda Qorovulbozor tumanlarida davom ettirilib, bayram tadbirlari oʻtkazilishi rejalashtirilgan asosiy maydonlar, madaniyat maskanlari, ochiq maydonlar, xiyobonlar va ularga tutash hududlarning holati tanqidiy-tahliliy koʻzdan kechirildi.
Jarayon davomida hududlarda obodonlashtirish va tozalash ishlarini jadallashtirish, bayram tadbirlarini yuqori saviyada tashkil etish, joylarni bayramona bezatish, peshlavhalar oʻrnatish, tungi yoritish tizimlarini talab darajasiga keltirish hamda mavjud infratuzilmani tartibga solish masalalariga alohida eʼtibor qaratildi.
Shuningdek, aholi gavjum boʻladigan hududlarda jamoat tartibini saqlash, fuqarolar xavfsizligini taʼminlash, kutilmagan holatlarning oldini olish va yoʻl harakati xavfsizligini kuchaytirish yuzasidan mahalliy mutasaddilar bilan atroflicha muhokamalar oʻtkazildi. Xavfsizlikni taʼminlash jarayonlarini toʻliq raqamlashtirish, zamonaviy kuzatuv kameralarini koʻpaytirish, ularning uzluksiz ishlashini taʼminlash hamda yagona tizimga integratsiya qilish boʻyicha ham aniq vazifalar belgilandi.
Oʻrganishlar yakunida aniqlangan kamchiliklarni qisqa muddatlarda bartaraf etish, bayram tadbirlarini koʻtarinki ruhda va yuqori saviyada oʻtkazish, fuqarolar osoyishtaligi va xavfsizligini toʻliq taʼminlash yuzasidan masʼul rahbarlarga tegishli koʻrsatma va topshiriqlar berildi. Belgilangan vazifalar ijrosi uchun aniq muddatlar belgilanib, amalga oshirilayotgan ishlarni qatʼiy nazoratga olish taʼkidlandi.
Buxoro viloyati IIB Axborot xizmati