Namanganda Respublika idoralararo muvofiqlashtiruvchi shtabining sayyor yigʻilishi oʻtkazildi
2026-08-12 10:10:00 / Yangiliklar
Prezidentning 2026-yil 5-yanvardagi PQ-1 va PQ-2-sonli qarorlari ijrosini taʼminlash maqsadida Bosh prokurorning birinchi oʻrinbosari B.Valiyev rahbarligida Respublika idoralararo muvofiqlashtiruvchi shtabining Namangan viloyatida sayyor yigʻilishi boʻlib oʻtdi.
Yigʻilishda shtab va ishchi guruh aʼzolari, mutasaddi idora va tashkilotlar rahbarlari ishtirok etib, tasdiqlangan «yoʻl xaritalari» ijrosi, hisobot koʻrsatkichlarining haqqoniyligi, mahallalarda xavfsiz muhitni taʼminlash hamda jinoyatchilikning barvaqt profilaktikasi samaradorligini oshirish masalalari muhokama qilindi.
Shuningdek, Namangan shahridagi 38-sonli umumtaʼlim maktabida joriy etilgan «AI-Psixolog» sunʼiy intellekt platformasi imkoniyatlari oʻrganilib, uni viloyatdagi barcha umumtaʼlim maktablarida joriy etish yuzasidan koʻrsatmalar berildi.
Oʻquvchi qizlar oʻrtasida erta turmush, erta tugʻruq va huquqbuzarliklarning oldini olishga qaratilgan «Dildosh ustozlar» loyihasi doirasida davra suhbati oʻtkazildi.
«Yoshlar markazi»da esa «1 oy – 4 mahalla» loyihasi taqdim qilinib, yoshlar bilan manzilli ishlash, ularning bandligini taʼminlash va boʻsh vaqtini mazmunli tashkil etish masalalari koʻrib chiqildi.
Respublika idoralararo muvofiqlashtiruvchi shtabining Namangan viloyatidagi oʻrganishlari davom etmoqda.
Namangan viloyati IIB Axborot xizmati