O‘zbеkiston Rеspublikаsi Ichki ishlаr vаzirligi

Yil davomida amalga oshirilgan xizmat faoliyati natijalari sarhisobi, kelgusidagi ustuvor vazifalarni belgilab olish, yoʻl qoʻyilgan kamchiliklarni oʻz oʻrnida bartaraf etish maqsadida Ichki ishlar vazirligi tizimida doimiy ravishda Hayʼat yigʻilishlari oʻtkazib kelinadi.

Ichki ishlar vaziri, general-leytenant Aziz Tashpulatov rahbarligida oʻtkazilgan navbatdagi Hayʼat yigʻilishi joriy yilning ikkinchi choragida amalga oshirilgan vazifalarga bagʻishlangan boʻlib, hayʼat aʼzolari, sohaviy xizmat rahbarlari hamda hududiy ichki ishlar organlarining shaxsiy tarkibi ishtirok etdi.

Yigʻilishda, birinchi navbatda 2026-yilning 6 oyda Respublika hududidagi kriminogen vaziyat, sodir etilgan ogʻir va oʻta ogʻir jinoyatlar muhokama qilindi. Mahallalarda xavfsiz muhitni yaratish, jamoat xavfsizligini taʼminlashda samaradorlikni oshirish, tezkor-qidiruv tadbirlari va jinoyatlarni fosh etishda tatbiq qilinayotgan yangicha yondashuvlar ijobiy natija berayotganligi qayd etildi.

Joriy yilda jami 125 387 ta siyosiy, madaniy, sport va boshqa ommaviy tadbirlar oʻtkazilib, ularda jami 70 mln. dan ortiq fuqarolarning xavfsizligi taʼminlandi.

Hisobot davri natijalariga koʻra jami 5 778 ta (64 foiz) mahallarda jinoyat sodir etilishiga yoʻl qoʻyilmadi. Shu bilan birga 476 ta mahallar “qizil” toifada qolayotganligi keskin tanqid qilindi.

Taʼkidlanishicha, jinoyatchilikka qarshi kurashish, ijtimoiy xavfli jinoyatlarni fosh etish va oldini olish borasidagi yondashuv tubdan oʻzgartirilib, jinoyatlarni prognoz qilishning yangi mexanizmi yaratilgani natijasida hisobot davrida oldini olish mumkin boʻlgan jinoyatlarning 87 foizi fosh etilib, jabrlanuvchilarning haq-huquqlari taʼminlandi.

Xodimlarning tezkorligi, zamonaviy texnologiyalardan unumli foydalanishi hamda alohida fuqarolarning faolligi natijasida jinoyatlarni aniqlanishi koʻrsatkichi 31.4 foizga yaxshilandi. Buning natijasida fuqarolarga yetkazilgan jami 1 trln 365 mlrd soʻmlik moddiy zarar qoplab berildi.

Sud va tergov organlaridan yashirinib, javobgarlikdan qochib yurgan qidiruvdagi 5 010 nafar shaxs qoʻlga olinib, keyingi jinoiy faoliyatiga chek qoʻyildi. Yashash manzilidan chiqib ketgan va bedarak yoʻqolgan 2 616 nafar shaxs qisqa fursatlarda aniqlanib, xavfli vaziyatlarni oldini olindi va ular oilasi bagʻriga qaytarildi.

Shuningdek, jinoyatchilikka qarshi kurashish, ayniqsa bezorilik holatlarini bartaraf etish, joylarda jinoyatchilikning salmogʻini yuqoriligicha qolishiga sabab boʻlayotgan omillarni bartaraf etish boʻyicha Jamoat tartibini saqlash xizmati hamda Huquqbuzarliklar profilaktikasi xizmati rahbarlarining axboroti tinglangan boʻlsa, Qoraqalpogʻiston Respublikasi Ichki ishlar vaziri, Toshkent shahri va Toshkent viloyati Ichki ishlar bosh boshqarmalari hamda Andijon, Qashqadaryo, Namangan, Surxondaryo viloyatlari ichki ishlar boshqarmalari rahbarlarining oʻz hududlaridagi kriminogen vaziyat boʻyicha hisobotlari eshitildi.

Hayʼat yigʻilishida bugungi kunning yana bir dolzarb masalalaridan biri — kiberjinoyatlarga qarshi kurashish borasida amalga oshirilgan ishlar, erishilgan natijalar hamda yoʻl qoʻyilgan kamchiliklar atroflicha muhokama qilindi.

Taʼkidlanishicha, Vazirlik tizimida 2026-yil “Kiberjinoyatlarga qarshi kurashish yili”, deb eʼlon qilinib, kiberjinoyatlarning oldini olish, aholi oʻrtasida kiberxavfsizlik madaniyatini oshirish va fuqarolarni internetdagi mavjud xavflardan ogohlantirishga qaratilgan profilaktik tadbirlar keskin kuchaytirildi. Markaziy bank bilan hamkorlikda yaratilgan maxsus tizim yoʻlga qoʻyilgani natijasida 29 trln soʻmning noqonuniy ravishda chetga chiqib ketishning oldi olindi hamda 18 838 ta jinoyatga aloqador bank kartalari bloklandi.

Hisobot davrida jami 9 282 ta kiberjinoyat fosh etildi, 4 011 ta jinoyat tashabbus asosida aniqlandi va 13 mingdan ortiq fuqarolarga yetkazilgan 120 mlrd 496 mln soʻmdan ziyod moddiy zarar qaytarildi.

Kiberjinoyatlarni oldini olishning asosiy tamoyillaridan biri aholini ogohlantirish ekanligini hisobga olgan holda, kuchli targʻibot ishlari amalga oshirilib, mamlakatimizning qariyb 23 mln. dan oshiq aholisi qamrab olindi.

Shu bilan birga, amalga oshirilayotgan ishlar yetarli emasligi tanqid qilindi. Ushbu yoʻnalishda fuqarolardan kelib tushayotgan murojaatlarni har tomonlama va puxta oʻrganish, kiberjinoyatlarning sodir etilish sabablari va ularga imkon berayotgan omillarni chuqur tahlil qilish zarurligi taʼkidlandi.

Ichki ishlar organlari xodimlarining kiberxavfsizlik sohasidagi bilim va koʻnikmalarini muntazam oshirib borish, ularni zamonaviy axborot texnologiyalari va kiberjinoyatlarni aniqlash hamda ularga qarshi kurashishning yangi usullariga oʻrgatish ishlarini jadallashtirish boʻyicha vazifalar belgilandi.

Shu bilan birga, kun tartibidagi masalalar yuzasidan xizmat intizomi va qonunchilikka rioya qilish holati boʻyicha masʼul rahbarlarning hisobotlari tinglanib, mavjud kamchiliklar tanqidiy-tahliliy ruhda muhokama qilindi.

Xodimlar tomonidan xizmat intizomi va qonunchilik talablariga qatʼiy rioya etilishini taʼminlash, ularning xizmat vazifalarini vijdonan va masʼuliyat bilan bajarishi ustidan taʼsirchan nazoratni kuchaytirish zarurligi taʼkidlandi. Shu bilan birga, intizomiy holatga taʼsir koʻrsatayotgan omillarni chuqur oʻrganish, muammolarni faqat oqibatlari bilan emas, balki ularni keltirib chiqarayotgan sabablar bilan birgalikda bartaraf etishga alohida eʼtibor qaratish lozimligi qayd etildi.

Ayniqsa, xodimlarning ijtimoiy himoyasini yanada kuchaytirish, ular uchun munosib xizmat va maishiy sharoitlarni yaratish, ijtimoiy-huquqiy muammolarini oʻz vaqtida aniqlash va amaliy yordam koʻrsatish masalasiga jiddiy eʼtibor qaratish zarurligi belgilandi. Zero, xodimlarning ijtimoiy barqarorligi va xizmat sharoitlari ularning xizmat intizomi, kasbiy masʼuliyati va ish samaradorligiga bevosita taʼsir koʻrsatadi.

Tadbirda, jismoniy va yuridik shaxslarning murojaatlari bilan ishlash, shaxsiy va sayyor qabullarni tashkil etish hamda ularning natijadorligini yanada oshirish masalalari muhokama qilindi.

Oʻzbekiston Respublikasi Prezidentining aholi bilan ochiq va samarali muloqotni taʼminlash, fuqarolarning murojaat qilish huquqini soʻzsiz amalga oshirish va davlat organlari faoliyatida inson manfaatlarini ustuvor taʼminlashga qaratilgan Farmoni talablaridan kelib chiqib, murojaatlar bilan ishlash holati tanqidiy-tahliliy koʻrib chiqildi.

Joriy yilning 6 oyida jami 205 154 ta murojaat kelib tushgan boʻlib, bu oʻtgan yilning mos davriga nisbatan 2 117 taga kam. Murojaatlarning 87,7 foizi qanoatlantirilgan, 11,3 foizi yuzasidan fuqarolarga malakali huquqiy tushuntirishlar berilgan, 0,9 foizi esa qonunchilikda belgilangan tartib va asoslarga koʻra koʻrib chiqishdan rad etilgan.

Shu bilan birga, murojaatlarni koʻrib chiqishda yoʻl qoʻyilayotgan kamchiliklar, ayrim rahbar va masʼullarning sustkashligi hamda murojaatlarning mazmun-mohiyatiga yetarlicha eʼtibor qaratmayotgani tanqidiy baholandi. Fuqarolar murojaatlarini oʻz vaqtida, sifatli va qonuniy hal etish, ularning muammolariga befarq munosabatda boʻlgan masʼullarga nisbatan qatʼiy chora koʻrish, samarali ish olib borayotgan xodimlarni esa ragʻbatlantirish boʻyicha aniq vazifalar belgilab berildi.

Hisobot natijalariga koʻra, oʻtgan 6 oyda davomida respublika hududidagi kriminogen vaziyatni barqarorlashtirishda jiddiy kamchiliklarga yoʻl qoʻyganligi sababli 6 nafar shahar va tuman ichki ishlar organlari boshliqlari, 2 nafar ularning jamoat xavfsizligini taʼminlash yoʻnalishi boʻyicha oʻrinbosarlari va 2 nafar viloyat ichki ishlar boshqarmalarining masʼul rahbarlarini lavozimidan ozod etish, 7 nafar rahbarlarga qattiq intizomiy jazo hamda 3 nafar rahbarning lavozimida qolish yoki qolmaslik masalasini koʻrib chiqish boʻyicha Hayʼat qarori qabul qilindi.

Shu bilan birga reyting natijalariga koʻra, oldini olishi mumkin boʻlgan jinoyatlarni sodir etilishiga yoʻl qoʻymagan va tashabbus bilan jinoyatlarni aniqlashda eng yaxshi natijalarga erishgan – birinchi oʻrin Toshkent viloyati, ikkinchi oʻrin Samarqand viloyati va uchinchi oʻrinni egallagan Fargʻona viloyatlari ichki ishlar boshqarmalari, shuningdek Navoiy viloyatining Karmana, Surxondaryo viloyatining Jarqoʻrgʻon, Fargʻona viloyatining Quva, Toshkent shahrining Yunusobod, Namangan viloyatining Namangan, Buxoro viloyatining Jondor, Toshkent viloyatining Piskent hamda Jizzax viloyatining Yangiobod tumanlari IIB rahbarlarini oʻrnatilgan tartibda ragʻbatlantirish boʻyicha takliflar kiritildi.

Shuningdek, Hayʼat yigʻilishida Davlat mustaqilligining 35-yilligini munosib nishonlashga tayyorgarlik koʻrish, bayram tadbirlarini yuqori saviyada oʻtkazish hamda jamoat tartibi va xavfsizligini taʼminlash maqsadida xodimlarni kuchaytirilgan xizmat tartibiga oʻtkazish masalalari koʻrib chiqildi.

Tinchlik va osoyishtalikni taʼminlash, jamoat tartibini saqlash hamda bayram tadbirlarini xavfsiz oʻtkazish boʻyicha masʼullarga aniq vazifa va topshiriqlar belgilab berildi.

Hayʼat yigʻilishida qoʻyilgan vazifalarning ijrosi ustidan qatʼiy nazorat oʻrnatilishi, har bir rahbar va xodimdan natijadorlik, intizom va shaxsiy masʼuliyat talab qilinishi qatʼiy talab sifatida qayd etildi.