Toshkent shahar Mirobod tumanida jamoat xavfsizligini taʼminlash boʻyicha kompleks oʻrganishlar oʻtkazilmoqda
2026-08-07 11:55:00 / Yangiliklar
Aholi xavfsizligini taʼminlash, jamoat tartibini mustahkamlash hamda huquqbuzarliklarning oldini olish boʻyicha profilaktik choralarni yanada kuchaytirish maqsadida Toshkent shahrining Mirobod tumanida Qoʻriqlash departamenti boshligʻi polkovnik Qobil Shodibekov boshchiligidagi ishchi guruh tomonidan kompleks oʻrganish ishlari amalga oshirilmoqda.
Ishchi guruh tarkibida departament boshligʻining barcha oʻrinbosarlari, sohaviy boshqarmalar rahbarlari va masʼul mutaxassislar ishtirok etib, hududda xavfsiz muhitni taʼminlashga qaratilgan chora-tadbirlarni har tomonlama tahlil qilmoqda.
Oʻrganishlar davomida mahallalar, turar joylar, taʼlim muassasalari, savdo va xizmat koʻrsatish obyektlari, ijtimoiy infratuzilma hamda Qoʻriqlash xizmati muhofazasiga olingan obyektlarda xavfsizlik tizimining holati atroflicha oʻrganilmoqda. Shuningdek, videokuzatuv vositalari, signalizatsiya tizimlari, muhandislik-texnik muhofaza vositalari hamda tezkor harakatlanuvchi naryadlar faoliyati tahlil qilinib, mavjud kamchiliklarni bartaraf etish yuzasidan aniq vazifalar belgilab berilmoqda.
Ishchi guruh aʼzolari aholi va tadbirkorlik subyektlari bilan ochiq muloqotlar oʻtkazib, ularning xavfsizlikka oid taklif va murojaatlarini tinglamoqda. Shu bilan birga, zamonaviy qoʻriqlash xizmatlarini keng joriy etish, raqamli texnologiyalardan samarali foydalanish va profilaktik choralarni kuchaytirish boʻyicha amaliy tavsiyalar ishlab chiqilmoqda.
Departament rahbari tomonidan har bir masʼul rahbarga oʻz yoʻnalishi boʻyicha aniq topshiriqlar berilib, hududda xavfsiz muhitni shakllantirishda tizimli yondashuvni taʼminlash, aholiga sifatli va zamonaviy qoʻriqlash xizmatlarini koʻrsatish, xizmat intizomi va tezkorlikni yanada oshirish ustuvor vazifa sifatida belgilab berildi.
Mazkur kompleks oʻrganishlar natijalari asosida Mirobod tumanida jamoat xavfsizligini taʼminlash samaradorligini yanada oshirish, huquqbuzarliklarning oldini olish va aholi uchun xavfsiz hamda osoyishta muhit yaratishga qaratilgan manzilli chora-tadbirlar amalga oshiriladi.
Qoʻriqlash departamenti tomonidan mamlakatimizda “Xavfsiz mahalla – xavfsiz hudud – xavfsiz yurt“ tamoyilini hayotga tatbiq etish, fuqarolarning tinch va osoyishta hayotini taʼminlash borasidagi ishlar izchil davom etmoqda.
IIV huzuridagi Qoʻriqlash departamenti