Fuqarolar bilan ochiq muloqot: Qashqadaryoda Ichki ishlar vaziri oʻrinbosari tomonidan sayyor qabul oʻtkazildi
2026-08-07 11:00:00 / Yangiliklar
Davlatimiz rahbari tomonidan belgilab berilgan ustuvor vazifalardan biri — aholi bilan ochiq va samarali muloqotni tizimli ravishda yoʻlga qoʻyishdan iborat.
Mazkur yoʻnalishda ichki ishlar organlari tomonidan fuqarolar bilan bevosita muloqotni taʼminlash, aholi murojaatlari va ehtiyojlarini atroflicha oʻrganish, kelib tushgan ariza va takliflarni qonunchilik talablari asosida oʻz vaqtida koʻrib chiqish hamda ular yuzasidan aniq chora-tadbirlar belgilash boʻyicha izchil ishlar amalga oshirilmoqda.
Joriy yilning 6-avgust kuni Qarshi shahrida Ichki ishlar vazirining komplayens va korrupsiyaga qarshi ichki nazorat boʻyicha oʻrinbosari polkovnik Rustam Mirzayev va viloyat IIB boshligʻi polkovnik Abduvoxid Ismoilov tomonidan sayyor qabul oʻtkazildi.
Qabul davomida ichki ishlar organlari tizimida korrupsiyaga qarshi kurashish, xizmat intizomi, qonuniylikka rioya etish, xizmat faoliyatida shaffoflikni taʼminlash, tergov va surishtiruv jarayonlari, ishga joylashish va qayta tiklash, yoʻl harakati xavfsizligi hamda fuqarolarning qonuniy huquq va manfaatlarini himoya qilish bilan bogʻliq masalalar yuzasidan 56 nafar fuqarolarning murojaatlar koʻrib chiqildi.
Eʼtiborli jihati, murojaatlarning 30 tasi qabul jarayonining oʻzida ijobiy hal etildi. Qoʻshimcha oʻrganish talab etgan masalalar esa masʼullarga biriktirilib, ularning ijrosi alohida nazoratga olindi.