Samarqand viloyatida aholi murojaatlari oʻrganilib, ichki ishlar organlarining xizmat faoliyati va infratuzilma obyektlari koʻzdan kechirildi
2026-08-07 08:10:00 / Yangiliklar
Ichki ishlar organlari faoliyati samaradorligini oshirish, xizmat intizomini mustahkamlash, aholi murojaatlari bilan ishlash tizimini yanada takomillashtirish hamda mavjud kamchiliklarni bartaraf etish maqsadida Ichki ishlar vaziri oʻrinbosari, polkovnik Diyorbek Sattarov boshchiligidagi ishchi guruh tomonidan Samarqand viloyati ichki ishlar organlarining xizmat faoliyati oʻrganildi.
“Komplayens va maʼnaviy madaniyat oyligi” doirasidagi oʻrganishlarda Samarqand shahrida aholi murojaatlarini manzilli koʻrib chiqish, ularning muammolariga amaliy yechim topish maqsadida sayyor qabul oʻtkazildi.
Qabul davomida 30 dan ortiq murojaat koʻrib chiqildi. Ularning aksariyati joyida ijobiy hal etildi. 14 ta murojaat yuzasidan fuqarolarga huquqiy tushuntirish berildi. Qoʻshimcha oʻrganish talab etuvchi 8 ta murojaat ijroga olinib, ularni qonuniy va oʻz vaqtida hal etish boʻyicha masʼullarga tegishli topshiriqlar yuklatildi. Shuningdek, sayyor qabul doirasida ilk bor ID-karta olayotgan yoshlarga tantanali ravishda shaxsini tasdiqlovchi hujjatlar topshirildi.
Tashrif davomida Samarqand shahrida oʻquv-amaliy seminar ham tashkil etildi. Unda xizmat uylarini belgilangan yagona namuna va talablar asosida taʼmirlash, binolarning tashqi hamda ichki qismlarini sifatli bezatish, hududlarni obodonlashtirish, shuningdek, qurilish-taʼmirlash ishlarini amaldagi meʼyor va standartlar asosida tashkil etish yuzasidan zarur tavsiya va tushuntirishlar bildirildi.
Ishchi guruh Toyloq tumani Ichki ishlar boʻlimida xodimlar uchun yaratilgan shart-sharoitlar, maʼmuriy binoda amalga oshirilgan qurilish-taʼmirlash va obodonlashtirish ishlari bilan tanishdi. Shu bilan birga, hududdagi kriminogen vaziyat va jinoyatchilikning oldini olishga qaratilgan profilaktik chora-tadbirlar tahlil qilinib, aholi bilan manzilli ishlash tizimini takomillashtirish, profilaktika inspektorlari faoliyati samaradorligini oshirish, raqamli texnologiyalarni keng joriy etish hamda xizmat intizomini yanada mustahkamlash boʻyicha ustuvor vazifalar belgilandi.
Pastdargʻom tumanida profilaktika inspektorining xizmat uyi, jamoat xavfsizligini taʼminlash boʻyicha amalga oshirilayotgan ishlar hamda tuman Ichki ishlar boʻlimi maʼmuriy binosida yaratilgan shart-sharoitlar oʻrganildi.
Oʻrganishlar yakunlari boʻyicha aniqlangan kamchiliklarni bartaraf etish, xizmat samaradorligini yanada oshirish hamda fuqarolar murojaatlarini tezkor va qonuniy hal etishni taʼminlash yuzasidan masʼul rahbarlarga aniq topshiriqlar yuklatildi.