O‘zbеkiston Rеspublikаsi Ichki ishlаr vаzirligi

Oʻzbekiston Respublikasi Ichki ishlar vaziri general-leytenant Poʻlat Bobojonov Ichki ishlar vazirligi Akademiyasining birinchi bosqich kursantlarining tantanali qasamyodi tadbirida qatnashib, “Jaloliddin Manguberdi” nomidagi stipendiyaga munosib tanlangan kursantlarga diplomlar topshirdi.

Ona Vatanimizni sevish, unga sadoqat bilan xizmat qilish, buyuk ajdodlarimizga munosib voris boʻlish Yangi Oʻzbekiston yoshlari zimmasidagi sharafli burchdir.

Ana shu ezgu maqsad yoʻlida Ichki ishlar vazirligi akademiyasiga oʻqishga kirgan yigit-qizlar tantanali ruhda qasamyod qildilar. Shu munosabat bilan poytaxtimizdagi “JAR” sport kompleksida boʻlib oʻtgan tadbirda Ichki ishlar vazirligi rahbariyati, qator davlat organlaridan mehmonlar, keng jamoatchilik hamda ommaviy axborot vositalari vakillari ishtirok etdi.

Tadbirni akademiya boshligʻi, polkovnik Rustam Xatamov ochib, yigʻilganlarni Oʻzbekiston Respublikasi davlat mustaqilligining oʻttiz uch yilligi bilan samimiy qutladi. Shundan soʻng kursantlar yuksak gʻurur va iftixor bilan sharafli burchni vijdonan bajarishga, chinakam xalqparvar ichki ishlar organi xodimi sifatida ona Vatanimiz va xalqimizga cheksiz sadoqat bilan xizmat qilishga qasamyod qildilar.

Aytish joizki, joriy yili akademiya kursantlari safiga yetti yuz nafarga yaqin oʻgʻil-qiz qabul qilindi. Kursantlarning boshlangʻich kasbiy va jangovar-jismoniy koʻnikmalarini shakllantirish maqsadida oʻquv-dala sharoitida mashgʻulotlar tashkil etildi. Endi ular uch yil davomida zamon talablari darajasida taʼlim oladilar.

Tantanali tadbirda ichki ishlar vaziri, general-leytenant Poʻlat Bobojonov soʻzga chiqib, ichki ishlar organlari faoliyatini takomillashtirish, soha uchun yetuk malakali kadrlar tayyorlash borasida amalga oshirilayotgan islohotlarga toʻxtaldi.

– Muhtaram Prezidentimiz kuni kecha mustaqillik bayrami munosabati bilan oʻtkazilgan tantanali marosimda yoshlarga murojaat qilib, “mamlakatimiz istiqboli, barcha ezgu niyatlarimiz ijobatini biz avvalo sizlarning timsolingizda koʻramiz”, deya alohida taʼkidladilar. Shu maʼnoda, tizimdagi islohotlarning amaliy natijasi ham oʻquv muassasalarida taʼlim olayotgan yoshlarning bilim salohiyati, kasbiga sadoqati, yurtga daxldorlik hissini namoyon etishiga bogʻliq. Bugun xizmat qasamyodini qabul qilib, sharafli yoʻl sari ilk qadamingizni tashladingiz. Zimmangizda zamonaviy bilim va koʻnikmalarni mukammal egallash, yetuk malakali mutaxassis boʻlib kamolga yetish, eng muhimi, Vatanimiz va xalqimizga yuksak sadoqat bilan xizmat qilishdek masʼuliyatli vazifalar turibdi, – dedi Poʻlat Bobojonov.

Shuningdek, tadbirda Oliy Majlis Senatining Mudofaa va xavfsizlik masalalari qoʻmita raisi Qutbiddin Burxonov ham soʻz olib, yoshlarni xalq va davlat manfaatlarini himoya qilishga, Yangi Oʻzbekistonimiz ravnaqi uchun munosib hissa qoʻshishga daʼvat etdi.

– Inson uchun oʻz Vatani, kindik qoni toʻkilgan goʻshadan muqaddas joy yoʻq. Kursant yoshlar muqaddas qasamyodga sodiq qolib, bilim va tafakkur, shijoat va mardlikda buyuk ajdodlarimizga munosib voris boʻlishlari lozim. Shundagina el-yurtimizning tinch va osoyishta hayotiga hech qanday yovuz kuch raxna sola olmaydi. Zero, farzandlarimizning hayotda mustahkam oʻrin egallab, kelajak maqsadlarga erishishi uchun barcha imkoniyatlar yaratilgan, – dedi ota-onalar nomidan soʻzga chiqqan Nargiza Mayusupova.

Shu kuni oʻqishdagi yutuqlari bilan tengdoshlariga ibrat koʻrsatayotgan iqtidorli kursantlar ichki ishlar vaziri hamda “Jaloliddin Manguberdi” nomidagi stipendiyalarga sazovor boʻldi. Bayramona oʻtgan tadbir ona yurtimizni madh etuvchi qoʻshiq bilan koʻtarinki ruhda yakunlandi.

IIV Akademiyasi Axborot xizmati