Oʻzbekiston Davlat mustaqilligining 33 yilligi Buxoro viloyati Ichki ishlar boshqarmasi va uning quyi tizimlarida ham keng tantana qilindi
2024-09-01 20:05:00 / Yangiliklar
Joriy yilning 30 avgust kuni Buxoro viloyati Ichki ishlar boshqarmasida “Bir boʻlsak-yagona xalqmiz, birlashsak-Vatanmiz” shiori ostida Oʻzbekiston Respublikasi mustaqilligining 33 yillik bayrami keng tantana qilindi.
Bayram tadbiri videokonferensaloqa tizimi orqali oʻtkazilib, unda ichki ishlar boshqarmasi va uning quyi tuzilmalari, shuningdek, hududiy ichki ishlar organlarining barcha shaxsiy tarkibi hamda taklif etilgan faxriy xodimlar ishtirok etdi.
Tantana, tadbir joyiga Oʻzbekiston Respublikasi davlat bayrogʻining olib kirilishi va shaxsiy tarkib tomonidan jonli ravishda davlat madhiyasini ijro etish bilan boshlandi.
Bayram tadbirini ochib bergan Ichki ishlar boshqarmasi boshligʻi podpolkovnik Ikromjon Tursunov Oʻzbekiston Respublikasi Ichki ishlar vaziri general-leytenant Poʻlat Bobojonovning bayram tabrigini oʻqib eshittirdi.
Shuningdek, soʻnggi yillarda ichki ishlar organlarida olib borilayotgan islohotlar sohada xizmat natijadorligining ortishiga, jinoyatchilik va huquqbuzarliklarning oldini olishda, sodir etilgan jinoyatlarning oʻz vaqtida, issiq izidan fosh etilishiga zamin yaratayotganini alohida taʼkidladi.
Shundan soʻng, bayram munosabati bilan taqdirlangan bir guruh viloyat ichki ishlar organlari xodimlari va faxriylariga mukofotlar tantanali ravishda topshirildi.
Jumladan, Oʻzbekiston Respublikasi Prezidentining Davlatimiz mustaqilligining oʻttiz uch yilligi munosabati bilan harbiy xizmatchilar va huquqni muhofaza qilish organlari xodimlaridan bir guruhini mukofotlash toʻgʻrisidagi Farmoniga asosan, Buxoro viloyati Gʻijduvon tumani ichki ishlar boshqarmasi boshligʻining oʻrinbosari – tergov boʻlimi boshligʻi Jasurbek Rustamovga “Sodiq xizmatlari uchun” medali bilan mukofotlanganligi eʼlon qilindi.
Bundan tashqari Oʻzbekiston Respublikasi Ichki ishlar vazirining tegishli buyrugʻi asosida, vatanimiz tinchligi va el-yurt osoyishtaligini taʼminlash yoʻlidagi koʻp yillik fidokorona xizmatlari, jinoyatchilikka qarshi kurash va uni oldini olish borasidagi samarali mehnati, oʻz xizmat burchini bajarish chogʻida mardlik va jasorat koʻrsatgan xodimlar turli darajadagi koʻkrak nishonlariga sazovor boʻlishdi.
2 nafar xodim — “Aʼlo xizmatlari uchun”, 1 nafar xodim — “1-darajali benuqson xizmatlari uchun”, 2 nafar xodim — “2-darajali benuqson xizmatlari uchun” , 2 nafar xodim — “3-darajali benuqson xizmatlari uchun” koʻkrak nishonlari, 2 nafar xodim Ichki ishlar vazirligining faxriy yorligʻi, 1 nafar xodim vazirning esdalik qoʻl soati, 1 nafar xodim kitoblar toʻplami bilan ragʻbatlantirilgan boʻlsa, 1 nafar isteʼfodagi faxriy xodim “Ichki ishlar organlarining faxriy xodimi” koʻkrak nishoni bilan mukofotlandi. Bundan tashqari, Ichki ishlar vazirining buyrugʻi bilan 1 nafar xodimga muddatidan ilgari “mayor” maxsus unvoni hamda 8 nafar xodimlarga birinchi “leytenant” maxsus unvonlari tantanali ravishda topshirildi.
4 nafar viloyat ichki ishlar organlarining xodimlari esa Ichki ishlar vazirining oʻrinbosari, general-mayor Bekmurod Abdullayevning tashakkurnomasi bilan taqdirlandi.
Shu bilan birga, bir guruh viloyat ichki ishlar organlari xodimlari Ichki ishlar boshqarmasi boshligʻining tegishli buyrugʻi bilan turli darajadagi mukofotlarga loyiq koʻrildi.
Jumladan, 9 nafar xodimlar boshqarma boshligʻining esdalik qoʻl soati, shuningdek, Respublika Ichki ishlar organlarining ayol xodimalari oʻrtasida joriy yilning 13-16 avgust kunlari Buxoro viloyatida oʻtkazilgan “Toʻmaris izdoshlari” musobaqasida faxrli 3-oʻrinni egallagan viloyat IIB jamoasi hamda joriy yilning 16-17 avgust kunlari Surxondaryo viloyatida boʻlib oʻtgan “Quvnoqlar va zukkolar – 2024” koʻrik tanlovining mintaqaviy bosqichida 2-oʻrinni egallab, mazkur koʻrik tanlovning respublika bosqichiga yoʻllanmani qoʻlga kiritgan Buxoro viloyati IIBning “Sheryurak” jamoasi aʼzolari hamda “Eng yaxshi vatanparvarlik ruhidagi videorolik” koʻrik tanlovining viloyat bosqichida gʻoliblikni qoʻlga kiritib, respublika bosqichiga yoʻllanmani qoʻlga kiritgan Axborot xizmati xodimi pul mukofoti bilan taqdirlandi.
Bundan tashqari, boshqarma boshligʻining mazkur buyrugʻi bilan, 624 nafar xodimlar pul mukofoti bilan taqdirlangan boʻlsa, shuningdek, 56 nafar xodimlarning harakatdagi intizomiy jazolari muddatidan avval bekor qilindi.
Albatta berilayotgan bunday yuksak eʼtibor va gʻamxoʻrlik har bir xodimga katta masʼuliyat bilan birga, tun-u kun oʻz ustidan ishlash, jamoat xavfsizligini taʼminlash uchun barcha kuch-vositalarni safarbar etish majburiyatini yuklaydi.
Buxoro viloyati IIB Axborot xizmati