IIV akademiyasida Koreya Respublikasi elchixonasining huquqni muhofaza qilish va konsullik masalalari boʻyicha vakili Kim Chje Xvan bilan uchrashuv boʻlib oʻtdi
2026-08-06 09:15:00 / Yangiliklar
Uchrashuv oldidan koreyalik mehmon akademiya rahbariyati hamrohligida oʻquv muassasasi faoliyati bilan yaqindan tanishdi. Kim Chje Xvanga taʼlim jarayonlari, yaratilgan zamonaviy sharoitlar, amaliyotga joriy qilingan ilgʻor yondashuvlar, akademiyaning xalqaro hamkorlik aloqalari haqida maʼlumot berildi.
Shundan keyin ikki tomonlama uchrashuv oʻtkazilib, unda mamlakatlarimiz oʻrtasidagi munosabatlarning bugungi holati va istiqbollari, koʻp qirrali aloqalarni yanada rivojlantirish masalalari muhokama qilindi.
Kim Chje Xvan keyingi yillarda Koreya – Oʻzbekiston munosabatlari oʻzaro hurmat, ishonch va strategik sheriklik tamoyillari asosida izchil rivojlanib borayotgani, ayniqsa taʼlim sohasidagi aloqalar yangi bosqichga koʻtarilganini qayd etdi.
Samimiy muloqot ruhida oʻtgan uchrashuvda huquqni muhofaza qilish tizimida tajriba almashinuvini kengaytirish, zamonaviy tahdid va xatarlarga qarshi kurashishda kadrlar salohiyatini oshirish, professor-oʻqituvchilar va taʼlim oluvchilar uchun dolzarb yoʻnalishlarda oʻquv kurslari tashkil etish, ilgʻor xorijiy tajribalarni amaliyotga keng joriy etish masalalari yuzasidan fikr almashildi.
Kim Chje Xvan akademiya vakillari tomonidan bildirilgan takliflarni qoʻllab-quvvatlagan holda taʼlim sifatini oshirishga qaratilgan istiqbolli loyihalarga hissa qoʻshishdan mamnunligini bildirdi. Shu kuni elchixona vakili oʻzaro hamkorlik doirasida koreyalik mutaxassislar tomonidan oʻtkazilishi rejalashtirilgan mashgʻulotlar uchun ajratilgan oʻquv xonalarini ham koʻzdan kechirdi.
IIV akademiyasi Axborot xizmati