O‘zbеkiston Rеspublikаsi Ichki ishlаr vаzirligi

Buxoro viloyati Ichki ishlar boshqarmasi boshligʻi podpolkovnik Ikromjon Tursunov hududlarda boʻlib, tuman sektor rahbarlari, tegishli masʼullar, mahallalar “yettilik” vakillari shuningdek, aholi bilan bevosita muloqot oʻtkazib, mavjud muammolarga yechim izlamoqda.

Bugun, 30-avgust kuni viloyat IIB boshligʻi podpolkovnik Ikromjon Tursunov viloyat 3-sektoriga qarashli Shofirkon tumanida boʻlib, bugungi kunda respublikamiz boʻylab “Bir boʻlsak-yagona xalqmiz, birlashsak-Vatanmiz” shiori ostida oʻtayotgan davlatimiz mustaqilligining 33-yilligi bayram tantanalari arafasida aholining bayram kayfiyatini oʻrganish, tumanni ijtimoiy-iqtisodiy rivojlantirish, mavjud muammolarga yechim topish, tuman hududida kriminogen vaziyatni barqarorlashtirish, mahallalarda “Obod va xavfsiz mahalla” tamoyili asosida amalga oshirilayotgan bunyodkorlik ishlari bilan yaqindan tanishdi.

Boshqarma boshligʻi dastlab, tuman markaziy oʻyingohida olib borilayotgan qayta rekonstruksiya ishlari, jumladan futbol maydoniga sunʼiy chim qoplamasini yopish bilan bogʻliq dastlabki qurilish ishlarining borishini koʻzdan kechirib, stadionni zamon talablari asosida toʻliq taʼmirlab topshirish borasida mutasaddilarga manzilli topshiriqlar berdi.

Shundan soʻng, boshqarma boshligʻi tumanning eng ogʻir hududlaridan biri “Dorigar” mahallasida oʻrganish ishlarini davom ettirdi.

Jumladan, viloyat Ichki ishlar boshqarmasi va tumanning taalluqli idoralaridan ushbu mahallaga masʼul etib biriktirilgan mutasaddilar va mahalla yettiligi ishtirokida hududda “Obod va xavfsiz xonadon” tamoyili asosida kelgusida amalga oshirilishi lozim boʻlgan rejali ishlarni muhokama qildi.

Shundan soʻng boshqarma boshligʻi masʼullar bilan birgalikda uyma-uy yurib, ijtimoiy ahvoli ogʻir, kam taʼminlangan, “Temir”, “Ayollar” va “Yoshlar” daftarlariga kirgan, shuningdek, uzoq muddatga ketib qiynalganligi sababli ichki ishlar organlarining saʼy harakatlari bilan vatanga qaytib kelgan shaxslar, ularning yaqinlari, voyaga yetmagan farzandlari hamda yakka yolgʻiz, nogiron va uzoq vaqtdan beri kasallikka chalinib davolanayotgan fuqarolarning holidan xabar olib, ushbu toifadagi shaxslarning muammolari va murojaatlarini oʻrgandi.

Jarayonda viloyat hamda tuman mutasaddi idoralarining masʼul rahbarlariga aniqlangan masalalar yechimi yuzasidan tavsiya, koʻrsatma hamda topshiriqlar berildi.

Shuningdek, ushbu mahalla aholisi bilan boʻlgan suhbatlarda muqobil elektr energiyasi manbalaridan hamda energiya tejovchi texnologiyalardan foydalanishning ahamiyati, foydali jihatlari borasida targʻibot va tushuntirish ishlari ham olib borildi.

Boshqarma boshligʻining bu kabi oʻrganishlari, viloyatning 3-sektoriga qarashli Gʻijduvon, Shofirkon va Vobkent tumanlarida hamda boshqa shahar va tumanlarning 3-sektorlariga qarashli mahallalarida bosqichma bosqich amalga oshirib kelinmoqda.

Buxoro viloyati IIB Axborot xizmati