Aralash jang sanʼatlari boʻyicha Oʻzbekiston chempionati yuqori saviyada tashkil etildi
2026-08-05 07:05:00 / Yangiliklar
Joriy yilning 29–31-iyul kunlari Ichki ishlar vazirligining “JAR” sport-sogʻlomlashtirish kompleksida aralash jang sanʼatlari (MMA) boʻyicha 18 yoshgacha boʻlgan sportchilar hamda kattalar oʻrtasida Oʻzbekiston chempionati yuqori saviyada tashkil etildi.
Nufuzli musobaqada respublikamizning barcha hududlaridan 400 nafarga yaqin sportchi ishtirok etib, chempionlik uchun murosasiz bahs olib bordi. Uch kun davom etgan bellashuvlarda ishtirokchilar oʻzlarining yuksak sport mahorati, jismoniy tayyorgarligi va gʻalabaga boʻlgan qatʼiyatini namoyon etib, muxlislarga qiziqarli hamda shiddatli janglarni taqdim etdilar.
Musobaqa yakunlariga koʻra, barcha vazn toifalarida gʻolib va sovrindorlar aniqlandi. Chempionat natijalari asosida eng iqtidorli sportchilardan Oʻzbekiston terma jamoasi shakllantiriladi. Mazkur terma jamoa joriy yilning oktyabr oyida Gruziyaning Tbilisi shahrida boʻlib oʻtadigan Jahon chempionatida mamlakatimiz sharafini himoya qiladi.
Umumjamoa hisobida Toshkent shahri 7 ta oltin, 4 ta kumush va 3 ta bronza, jami 14 ta medal bilan birinchi oʻrinni egalladi. Toshkent viloyati 5 ta oltin, 1 ta kumush va 13 ta bronza, jami 19 ta medal bilan ikkinchi, Qashqadaryo viloyati esa 3 ta oltin, 2 ta kumush va 8 ta bronza, jami 13 ta medal bilan uchinchi oʻrindan joy oldi.
Chempionat davomida jami 128 ta medal oʻz egalariga topshirildi. Mazkur musobaqa aralash jang sanʼatlarini keng ommalashtirish, yosh isteʼdodlarni kashf etish va xalqaro maydonlarda yurtimiz sharafini munosib himoya qiladigan kuchli terma jamoani shakllantirish yoʻlida muhim bosqich boʻladi.
Musobaqa gʻolib va sovrindorlari tantanali ravishda taqdirlandi.
Gʻolib va sovrindor sportchilarni samimiy muborakbod etamiz hamda Oʻzbekiston terma jamoasiga Jahon chempionati musobaqalarida yuksak natijalar va ulkan zafarlar tilaymiz.