“Criminology AI” loyihasi doirasida Singapurning ilgʻor tajribasi oʻrganildi
2026-08-03 11:25:00 / Yangiliklar
Oʻzbekiston Respublikasi Kriminologiya tadqiqot instituti tomonidan davlat maqsadli dasturi doirasida amalga oshirilayotgan “Sodir etilgan jinoyatlarning sabab va sharoitlarini tahlil qilish asosida jinoyatlarning barvaqt oldini olishga qaratilgan milliy “Criminology AI” — sunʼiy intellekt texnologiyasini ishlab chiqish” ilmiy-amaliy tadqiqot loyihasi doirasida Institut delegatsiyasining Singapur Respublikasiga xizmat safari amalga oshirildi.
Amaliy tashrif davomida delegatsiya aʼzolari Singapur politsiya kuchlari hamda Jamoat xavfsizligini taʼminlash sohasida ilm-fan va texnologiyalarni rivojlantirish agentligi — Home Team Science and Technology Agency mutaxassislari bilan uchrashuvlar oʻtkazdi.
Uchrashuvlarda jinoyatchilikka qarshi kurashish va huquqbuzarliklarni barvaqt oldini olishda sunʼiy intellekt texnologiyalaridan foydalanish, katta hajmdagi maʼlumotlarni tahlil qilish, kriminogen xavflarni baholash va prognozlash tizimlarini qoʻllash boʻyicha Singapurning ilgʻor tajribasi oʻrganildi.
Shuningdek, huquqni muhofaza qiluvchi organlar faoliyatini raqamlashtirish, tahliliy maʼlumotlar asosida tezkor va asoslantirilgan boshqaruv qarorlarini qabul qilish, zamonaviy axborot tizimlarini joriy etish hamda idoralararo maʼlumot almashinuvini takomillashtirish masalalari yuzasidan atroflicha fikr almashildi.
Muloqotlar jarayonida milliy “Criminology AI” platformasini ishlab chiqishda Singapur tajribasidan samarali foydalanish, ikki davlat mutaxassislari oʻrtasida ilmiy va amaliy tajriba almashish, jinoyatlarning sabab va shart-sharoitlarini kompleks tahlil qilish hamda kriminogen xavflarni barvaqt aniqlash imkonini beruvchi innovatsion yechimlarni joriy etish masalalari muhokama qilindi.
Mazkur amaliy tashrif natijalari Oʻzbekistonda jinoyatchilikni ilmiy asosda tahlil qilish, prognozlash va barvaqt profilaktika qilishning zamonaviy raqamli mexanizmlarini shakllantirish, shuningdek, milliy “Criminology AI” texnologiyasini xalqaro ilgʻor tajribalar asosida ishlab chiqishga xizmat qiladi.
Kriminologiya tadqiqot instituti