Qoraqalpog‘iston Respublikasida aholi murojaatlari o‘rganilib, ichki ishlar organlarining xizmat faoliyati va infratuzilma obyektlari ko‘zdan kechirildi
2026-08-01 09:00:00 / Yangiliklar
O‘zbekiston Respublikasi Ichki ishlar vaziri o‘rinbosarlari — polkovnik Diyorbek Sattarov va polkovnik Rustam Mirzayev tomonidan Qoraqalpog‘iston Respublikasi ichki ishlar organlarining xizmat faoliyati kompleks o‘rganildi.
Tashrif doirasida Nukus shahridagi Yoshlar markazida aholi murojaatlarini manzilli o‘rganish va mavjud muammolarga amaliy yechim topish maqsadida sayyor qabul o‘tkazildi.
Qabul davomida 47 nafar fuqaroning 10 ta yo‘nalishdagi murojaati ko‘rib chiqilib, ularning 23 tasi joyida ijobiy hal etildi, 15 tasi bo‘yicha huquqiy maslahat va tushuntirishlar berildi. Qo‘shimcha o‘rganish talab etilgan 9 ta murojaat ijroga qaratilib, mas’ullarga tegishli topshiriqlar berildi. Shuningdek, qabul doirasida birinchi marotaba ID-karta olayotgan 10 nafar yoshga hamda O‘zbekiston Respublikasi fuqarosi deb tan olingan bir guruh hamyurtlarimizga shaxsini tasdiqlovchi hujjatlar tantanali ravishda topshirildi.
Tashrif davomida IIV Malaka oshirish instituti Nukus filialining yangi qurilayotgan binosida amalga oshirilayotgan bunyodkorlik ishlari, kelgusida xodimlarni o‘qitish va kasbiy tayyorgarligini oshirish uchun yaratilayotgan zamonaviy shart-sharoitlar o‘rganildi.
Qoraqalpog‘iston Respublikasi IIV Yo‘l harakati xavfsizligi boshqarmasi Ma’muriy amaliyot markazida xodimlarning xizmat faoliyati, ish jarayonlari va ular uchun yaratilgan sharoitlar bilan tanishildi.
Taxiatosh tumani Ichki ishlar bo‘limida esa hududdagi kriminogen vaziyat, jinoyatchilik va huquqbuzarliklarning oldini olish borasida amalga oshirilayotgan profilaktik ishlar muhokama qilindi. Aholi bilan manzilli ishlash, profilaktika inspektorlari faoliyati samaradorligini oshirish, zamonaviy axborot texnologiyalaridan keng foydalanish, xizmat intizomi va xodimlarning kasbiy salohiyatini mustahkamlash bo‘yicha ustuvor vazifalar belgilab berildi.
Shu bilan birga, “Jayhun” mahalla fuqarolar yig‘ini, profilaktika inspektorining xizmat uyi va mahallada jamoat xavfsizligini ta’minlash borasida tashkil etilgan ishlar ham o‘rganildi.
O‘rganishlar yakunida aniqlangan masalalarni bartaraf etish, xizmat samaradorligini yanada oshirish, fuqarolar murojaatlariga tezkor va qonuniy yechim topish bo‘yicha mas’ul rahbarlarga tegishli topshiriq va tavsiyalar berildi.