O‘zbеkiston Rеspublikаsi Ichki ishlаr vаzirligi

Moʻgʻuliston poytaxti Ulan-Bator shahrida Osiyo politsiya taʼlim muassasalari assotsiatsiyasi (APTA) Bosh assambleyasining oʻninchi yigʻilishi boʻlib oʻtdi.

Unda Janubiy Koreya, Indoneziya, Filippin, Nepal, Tailand, Shri-Lanka, Sharqiy Timor, Moʻgʻuliston va Oʻzbekistondan tashkilotga aʼzo 14 ta taʼlim muassasasi vakillari qatnashdi.

Oʻzaro munosabatlarni yangi bosqichga olib chiqish, hamkorlik aloqalarini kengaytirish, huquqni muhofaza qiluvchi organlar uchun kadrlar tayyorlashda ilgʻor yondashuvlarni qoʻllash yigʻilish kun tartibidagi asosiy masala boʻldi.

Soʻzga chiqqanlar bugungi global sharoitda taʼlim integratsiyasini kuchaytirish dolzarbligini taʼkidlagan holda xalqaro tashkilot manfaatli aloqalarni yangi imkoniyatlar bilan boyitishda muhim platformaga aylanganini eʼtirof etishdi.

Yigʻilishda 2024–2028-yillarga moʻljallangan strategik reja doirasida amalga oshirilgan ishlar va kelgusidagi vazifalar muhokama qilindi. Vyetnam xalq xavfsizlik akademiyasi tashkilot aʼzoligiga qabul qilingan boʻlsa, BMT Giyohvand moddalar va jinoyatchilik boʻyicha boshqarmasi (UNODC)ning Janubi-Sharqiy Osiyo va Tinch okeani mintaqasi boʻyicha vakiliga muloqot boʻyicha doimiy hamkor maqomi berildi.

APTA vitse-prezidenti, Moʻgʻuliston ichki ishlar universiteti rahbari T. Suxbold munosabatlarning oʻzaro ishonch va birdamlik ruhi bilan mustahkamlanib borayotgani kelajak maqsadlar sari muhim qadam boʻlishini taʼkidlab oʻtdi.

Yigʻilish davomida tashkilotga aʼzo taʼlim muassasalari delegatlari oʻz taqdimotlari bilan ishtirok etdi.

Xususan, IIV Akademiyasi boshligʻining ilmiy ishlar va innovatsiyalar boʻyicha oʻrinbosari N. Turgʻunova mamlakatimiz ichki ishlar organlari uchun yuqori malakali kadrlar tayyorlash maqsadida amalga oshirilayotgan keng qamrovli islohotlar, oʻquv dargohida yoʻlga qoʻyilgan taʼlim mexanizmlari, xalqaro aloqalarda ustuvor ahamiyat kasb etayotgan tamoyillar haqida maʼruza qildi. Shu yerning oʻzida yigʻilganlarga akademiya faoliyatiga oid viderolik taqdim qilindi.

Shu kuni “Politsiya xodimlarini tayyorlashda sifatni baholash va rivojlanish tendensiyalari” mavzusiga bagʻishlangan xalqaro konferensiya ham oʻtkazildi. Ilmiy anjumanda taʼlim jarayonlarini takomillashtirish, amaliyotga raqamli yondashuvlarni keng joriy qilish, politsiya xodimlari salohiyatini rivojlantirish masalalari muhokama qilindi.

Soʻzga chiqqanlar tomonidan oʻqitish dasturlarini xalqaro standartlarga moslashtirish, kiberjinoyatchilik, sunʼiy intellekt va raqamli dalillar sohasida qoʻshma mashgʻulotlar tashkil etish, raqamli platformalar va integratsiyalashgan tizimlarni yoʻlga qoʻyish, ilmiy hamkorlikni rivojlantirish borasida takliflar bildirildi.

Aytish joizki, Moʻgʻuliston safari chogʻida APTAga aʼzo taʼlim tashkilotlari rahbarlari ishtirokida ikki tomonlama uchrashuvlar ham boʻlib oʻtdi. IIV akademiyasi vakillari Moʻgʻuliston ichki ishlar universiteti mutasaddilari bilan muloqot qilib, istiqboldagi rejalar yuzasidan fikr almashdilar. Uchrashuv yakunida oʻquv muassasalari oʻrtasida oʻzaro anglashuv memorandumi imzolandi.

Bir soʻz bilan aytganda, APTA Bosh assambleyasining navbatdagi yigʻilishi zamonaviy tahdidlar sharoitida saʼy-harakatlarni birlashtirish, hamkorlikni amaliy jihatdan mustahkamlash, global muammolarga qarshi birgalikda yechim topishda muhim ahamiyat kasb etdi.

IIV Akademiyasi Axborot xizmati