Vatanga sadoqat va xalq manfaatlariga xizmat gʻoyasi bilan tarbiyalangan Yangi Oʻzbekiston ofitserlari safi kengaydi
2026-07-30 08:00:00 / Yangiliklar
Mamlakatimizda Davlat rahbarining inson qadrini ulugʻlash, qonun ustuvorligini taʼminlash hamda professional davlat xizmatini shakllantirishga qaratilgan siyosatlari doirasida huquqni muhofaza qilish tizimini yanada takomillashtirishga alohida eʼtibor qaratilmoqda. Ayniqsa, ichki ishlar organlarini zamonaviy bilim va yuksak kasbiy salohiyatga ega, Vatan taqdiriga daxldorlik hissi bilan yashaydigan kadrlar bilan taʼminlash ustuvor vazifalardan biri hisoblanadi.
Ana shu ezgu maqsadlar Oʻzbekiston Respublikasi Huquqni muhofaza qilish akademiyasini muvaffaqiyatli tamomlagan bitiruvchilarga maxsus unvon berish hamda ichki ishlar organlari xodimining xizmat qasamyodini qabul qilishga bagʻishlangan tantanali marosimda yana bir bor oʻz ifodasini topdi.
Tadbir mamlakatimizda huquq-tartibot tizimini mustahkamlashga qaratilgan islohotlarning amaliy natijasi sifatida alohida ahamiyat kasb etdi. Bugun ichki ishlar organlari faoliyatiga qoʻyilayotgan talablar xodimlardan chuqur huquqiy bilim, yuksak maʼnaviyat, tashabbuskorlik, zamonaviy fikrlash va xalq manfaatlariga sadoqatni talab etmoqda.
Marosimda kadrlar tayyorlash tizimida amalga oshirilgan islohotlar, taʼlim jarayonining zamonaviy talablar asosida takomillashtirilgani hamda nazariya va amaliyot uygʻunligi oʻz samarasini berayotgani taʼkidlandi. Qayd etilganidek, Huquqni muhofaza qilish akademiyasi huquqiy bilim bilan bir qatorda yuksak masʼuliyat hissiga ega, mustaqil qaror qabul qila oladigan va zamonaviy tahdidlarga munosib javob beradigan ofitserlarni tayyorlashda muhim oʻrin tutmoqda.
Tadbirning eng hayajonli lahzalaridan biri bitiruvchilarga birinchi maxsus unvon — “leytenant” unvonining tantanali ravishda topshirilishi boʻldi. Taʼkidlanganidek, mazkur unvon davlat va xalqning yuksak ishonchi, qonunga sadoqat hamda jamoat xavfsizligini taʼminlash yoʻlidagi katta masʼuliyat timsolidir. Endi yosh ofitserlar zimmasida fuqarolarning huquq va erkinliklarini himoya qilish, huquqbuzarliklarning oldini olish va jamiyatda qonuniylikni mustahkamlashdek sharafli vazifalar turibdi.
Xizmat qasamyodining qabul qilinishi yosh ofitserlar uchun Vatanga sadoqat, xalq ishonchini oqlash va xizmat burchini vijdonan ado etishga berilgan hayotiy ahd sifatida eʼtirof etildi. Shuningdek, tadbirda milliy davlatchilik anʼanalariga murojaat qilinib, Sohibqiron Amir Temurning adolat, jasorat, qatʼiyat va hushyorlikka oid hayotiy tamoyillari bugungi huquqni muhofaza qilish tizimi xodimlari uchun ham muhim dasturilamal ekani qayd etildi.
Taʼkidlanganidek, Davlat rahbarining huquqni muhofaza qilish organlarini xalq manfaatlariga xizmat qiladigan, ochiq, professional va zamonaviy tizimga aylantirishga qaratilgan siyosatlari natijasida sohaga yuksak bilim, mustahkam fuqarolik pozitsiyasi va vatanparvarlik ruhiga ega yosh kadrlar kirib kelmoqda.
Tantanali marosim yakunida bitiruvchilar ichki ishlar organlari safiga qabul qilingani, birinchi maxsus unvonga sazovor boʻlgani hamda xizmat qasamyodini qabul qilgani munosabati bilan tabriklanib, ularga xalq va Vatan manfaatlariga sadoqat bilan xizmat qilish, davlat va xalq ishonchini munosib oqlash yoʻlida ulkan muvaffaqiyatlar tilab qolindi.
Shubhasiz, Yangi Oʻzbekistonning tinchligi va barqaror taraqqiyoti bilimli, fidoyi va masʼuliyatli kadrlar faoliyati bilan chambarchas bogʻliq.
Ichki ishlar organlari safiga qoʻshilgan yangi avlod ofitserlari yurtimizda qonun ustuvorligi, jamoat xavfsizligi va xalq osoyishtaligini taʼminlash yoʻlida munosib xizmat qilishiga ishonch komil.