Marosimda Ichki ishlar vaziri tomonidan aholi salomatligini mustahkamlash, sogʻlom avlodni tarbiyalashning muhim omili sifatida mamlakatimizda sport keng rivojlanayotganligi, ichki ishlar organlari xodimlarining saʼy harakatlari bilan mahallalardagi sogʻlom muhit, hududiy musobaqalar, “Besh tashabbus olimpiadasi” taʼsirida sportsevarlar safi kengayib borayotganligi, ular orasidan mahoratli professional sportchilar tayyorlanayotganligiga alohida urgʻu berildi.

Shuningdek, bu yilgi Olimpiya oʻyinlarida sportchilarimiz Yangi Oʻzbekiston yoshlari qanday kuchga ega ekanligini butun dunyoga koʻrsatganligi va bu sportchilar orasida Ichki ishlar vazirligi xodimlari borligi tizimdagi yoshlar uchun katta motivatsiya berayotganligi eʼtirof etildi.

Xizmat vazifalariga sidqidildan yondashib, ichki ishlar organlarida sogʻlom turmush tarzini keng targʻib qilish, shaxsiy tarkib orasida sport turlarini yanada ommalashtirish ishlariga qoʻshgan munosib hissasi hamda Fransiyaning Parij shahrida oʻtkazilgan XXXIII yozgi Olimpiya oʻyinlarida faol ishtirok etganliklari uchun bir qator xodimlar mukofotlandi, jumladan:

oltin medal sohiblari leytenant Abdumalik Xalokov hamda leytenant Lazizbek Mullajonovlarga muddatidan avval “Katta leytenant” maxsus unvoni hamda esdalik sovgʻasi bilan;

bronza medal sohibi safdor Muzaffarbek Turaboyev “Leytenant” maxsus unvoni hamda esdalik sovgʻasi bilan;

olimpiya oʻyinlari ishtirokchilari, jahon chempionati bronza medal sohibi leytenant Islomjon Bahramov, yozgi Osiyo oʻyinlari oltin medal sohibi kichik serjant Yekaterina Voronina, ikki karra Osiyo chempionati bronza medal sohibi kichik serjant Aktenge Keunimjayeva, ikki karra yozgi Olimpiya oʻyinlari ishtirokchisi, uch karra Osiyo chempionati sovrindori safdor Sharofiddin Boltaboyev, Osiyo va Jahon chempionati bronza medal sohibi safdor Murodjon Yoʻldoshev va Jahon chempionati oltin medal sohibi safdor Aram Vardanyan Ichki ishlar vazirining “Faxriy yorligʻi” va esdalik sovgʻasi bilan;

sportning Boks turi ustasi, Jahon chempioni, mayor Isroil Madrimov “Aʼlo xizmatlari uchun” koʻkrak nishoni hamda esdalik sovgʻasi bilan taqdirlandilar.

Tantanali tadbirda mukofotlangan xodimlar hamda Olimpiada chempionlari soʻzga chiqib mamlakatimizda, shuningdek ichki ishlar organlari tizimida xodimlarni sport bilan shugʻullanishi uchun yaratilayotgan sharoit va ularga eʼtibor, yoshlar siyosati va sport sohasiga qaratilayotgan maqsadli islohotlarni eʼtirof etib oʻtdilar.