Qoʻriqlash texnik vositalarini mahalliylashtirish – zamonaviy xavfsizlik sari muhim qadam
2026-07-26 11:00:00 / Yangiliklar
Bugun Oʻzbekiston Respublikasi Ichki ishlar vazirligi huzuridagi Qoʻriqlash departamenti boshligʻi polkovnik Qobil Shodibekov qoʻriqlashning zamonaviy texnik vositalarini mahalliylashtirish hamda sanoat mahsulotlarini ishlab chiqarish boʻyicha amalga oshirilayotgan ishlar bilan tanishdi.
Xususiy sektor bilan sheriklik asosida tashkil etilayotgan mazkur loyiha doirasida ishlab chiqarish sexlarida yaratilgan sharoitlar, elektron platalarni tayyorlash, texnik qurilmalarni yigʻish, dasturlash, sinovdan oʻtkazish va sifat nazorati jarayonlari oʻrganildi.
Tashrif davomida obyektlar va xonadonlarni qoʻriqlashda foydalaniladigan elektron qurilmalar, ularning tarkibiy qismlari hamda ehtiyot qismlarini mahalliy sharoitda ishlab chiqarish imkoniyatlariga alohida eʼtibor qaratildi.
Mutasaddilar tomonidan ishlab chiqarish quvvatlari, texnologik jarayonlar, mahsulotlarning texnik koʻrsatkichlari va ularni qoʻriqlash tizimlariga joriy etish istiqbollari haqida maʼlumot berildi. Taʼkidlanganidek, ishlab chiqarish jarayonlari toʻliq yoʻlga qoʻyilgandan soʻng obyektlar va xonadonlarni qoʻriqlashda foydalaniladigan texnik mahsulotlarning 90 foizini mahalliylashtirish rejalashtirilgan.
Bu, oʻz navbatida, import mahsulotlariga boʻlgan ehtiyojni keskin kamaytirish, qurilmalar tannarxini maqbullashtirish, ularni mahalliy sharoitlarga moslashtirish hamda texnik xizmat koʻrsatish tezkorligini oshirish imkonini beradi. Shuningdek, xususiy sektorning ishlab chiqarish tajribasi va texnologik imkoniyatlaridan samarali foydalanish, raqobatbardosh va sifatli mahsulotlar turini kengaytirish hamda sohada yangi ish oʻrinlarini yaratish masalalari muhokama qilindi.
Oʻrganish yakunlari boʻyicha ishlab chiqarish jarayonlarini jadallashtirish, mahsulotlarning sifat va ishonchlilik koʻrsatkichlarini oshirish, shuningdek, mahalliy qoʻriqlash texnik vositalarini amaliyotga bosqichma-bosqich joriy etish yuzasidan tegishli vazifalar belgilab berildi.
IIV huzuridagi Qoʻriqlash departamenti Axborot xizmati