Oʻzbekiston Respublikasining biometrik pasportlari xavfsizligi mustahkamlanmoqda
2026-07-23 17:00:00 / Yangiliklar
Oʻzbekiston Respublikasi IIV huzuridagi Migratsiya va personallashtirish departamenti Personallashtirish markazi delegatsiyasi joriy yil 21-iyul kuni Kanadaning Monreal shahrida joylashgan Xalqaro fuqaro aviatsiyasi tashkiloti (ICAO) bosh ofisiga tashrif buyurdi.
Tashrif doirasida Oʻzbekiston fuqarolarining biometrik pasportlari xavfsizligini taʼminlovchi raqamli sertifikatlar — PKI (Ochiq kalitlar infratuzilmasi) va ICAO PKD (Ochiq kalitlar reyestri) — muvaffaqiyatli yangilandi.
Bu jarayon ICAOning Doc 9303 xalqaro standarti talablariga toʻliq mos ravishda amalga oshirildi.
Yangilangan sertifikatlar ICAO PKD tizimi orqali barcha ishtirokchi davlatlarga yuborildi. Bu, oʻz navbatida, dunyoning istalgan nuqtasidagi xorijiy davlatlar chegara xizmatlari tomonidan Oʻzbekiston fuqarolarining biometrik pasportlarini tekshirish jarayonida yuzaga kelishi mumkin boʻlgan muammolarni bartaraf etadi.
Ushbu yangilanish biometrik pasportlardagi maʼlumotlarning yaxlitligini va xalqaro sayohatlar xavfsizligini yanada samarali taʼminlashga xizmat qiladi.
Oʻzbekiston Respublikasi ICAO PKD tizimining faol ishtirokchisi sifatida elektron hujjatlar infratuzilmasini takomillashtirish va xalqaro hamkorlikni mustahkamlash borasidagi ishlarni izchil davom ettiradi.