Interpol orqali xalqaro qidiruvda boʻlgan uch nafar shaxs Oʻzbekistonga qaytarildi
2026-07-22 16:00:00 / Yangiliklar
Interpolning Oʻzbekiston Respublikasidagi Milliy markaziy byurosi Turkiya Respublikasi huquqni muhofaza qiluvchi organlari hamda Oʻzbekistonning Istanbul shahridagi Bosh konsulxonasi bilan hamkorlikda oʻtkazilgan tezkor-qidiruv tadbirlari natijasida xalqaro qidiruvda boʻlgan uch nafar shaxsni Oʻzbekistonga ekstraditsiya qilishga erishdi.
Mazkur natija Oʻzbekiston va Turkiya huquqni muhofaza qiluvchi organlari oʻrtasida yoʻlga qoʻyilgan samarali hamkorlik, jinoyatchilikka qarshi kurashish hamda qidiruvdagi shaxslarni aniqlash va ushlash boʻyicha tezkor axborot almashinuvining amaliy samarasidir.
Tezkor-qidiruv tadbirlari davomida Turkiyaning Istanbul shahrida yashirinib yurgan xalqaro qidiruvdagi uch nafar shaxsning turgan joyi aniqlanib, ular qoʻlga olindi.
Jumladan, Samarqand viloyatida tugʻilgan 28 yoshli shaxs jinsiy zoʻravonlik bilan bogʻliq ogʻir jinoyatni sodir etganlikda ayblanib xalqaro qidiruvga berilgan edi.
Shuningdek, Buxoro viloyatida tugʻilgan 34 yoshli shaxs firibgarlik jinoyatini sodir etganlikda ayblanib qidiruvda boʻlgan.
Yana bir holatda esa Toshkent shahrida tugʻilgan 50 yoshli shaxs yirik miqdordagi firibgarlik jinoyatini sodir etganlikda ayblanib xalqaro qidiruvga eʼlon qilingan edi.
Qoʻlga olingan shaxslar belgilangan tartibda Oʻzbekistonga olib kelinib, tegishli huquqni muhofaza qiluvchi organlarga topshirildi.
Interpolning Oʻzbekiston Respublikasidagi Milliy markaziy byurosi xalqaro hamkorlik mexanizmlaridan samarali foydalangan holda transmilliy jinoyatchilikka qarshi kurashish, qidiruvdagi shaxslarni aniqlash va ularni javobgarlikka tortish ishlarini izchil davom ettirmoqda.
Interpolning Oʻzbekiston Respublikasidagi Milliy markaziy byurosi