IIV Jamoat xavfsizligi departamenti Huquqbuzarliklar profilaktikasi xizmati tomonidan 2026-yilning birinchi yarim yilligi davomida amalga oshirilgan ishlar muhokama qilindi
2026-07-21 09:00:00 / Yangiliklar
Joriy yilning 20-iyul kuni Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati boshligʻi polkovnik Sharof Uralov rahbarligida xizmatning 2026-yil birinchi yarim yilligi yakunlariga bagʻishlangan tanqidiy-tahliliy yigʻilish boʻlib oʻtdi.
Yigʻilishda: 2026-yilning 6 oyi davomida jinoyatchilik va huquqbuzarliklarni barvaqt oldini olish borasida amalga oshirilgan ishlar, yoʻl qoʻyilgan xato va kamchiliklar atroflicha muhokama qilindi; viloyat, tuman (shahar) va mahalla kesimida huquqbuzarliklar profilaktikasi boʻlinmalari rahbar va xodimlarining reyting koʻrsatkichlari tahlil qilinib, erishilgan natijalar va mavjud muammolar yuzasidan tegishli vazifalar belgilab berildi.
Taʼkidlanganidek, mamlakatimizda jamoat xavfsizligini taʼminlash va har bir mahallada xavfsiz muhitni shakllantirish davlat siyosatining ustuvor yoʻnalishlaridan biri hisoblanadi. Shu maqsadda huquqbuzarliklarning barvaqt oldini olish, aholi bilan manzilli ishlash va zamonaviy boshqaruv mexanizmlarini joriy etish boʻyicha izchil chora-tadbirlar amalga oshirilmoqda.
Amalga oshirilgan tizimli ishlar natijasida joriy yilning 6 oyida oldini olish mumkin boʻlgan jinoyatlar soni 2 309 taga yoki 14 foizga kamayib, 16 651 tadan 14 342 taga tushdi. Shuningdek: 5 778 ta (64 foiz) mahallada birorta ham jinoyat sodir etilishiga yoʻl qoʻyilmadi;
2 738 ta (30 foiz) mahallada esa jinoyatlar sonining kamayishiga erishildi. Yigʻilishda huquqbuzarliklar profilaktikasi boʻlinmalari xodimlari faoliyatini xolis va shaffof baholash maqsadida joriy etilgan reyting tizimining samaradorligi ham tahlil qilindi.
Qayd etilganidek, mazkur tizim orqali har bir xodimning xizmat natijalari har chorak aniq mezonlar asosida baholanib, ularning faoliyati doimiy monitoring qilib borilmoqda.
Yigʻilish yakunida xizmat intizomini yanada mustahkamlash, har bir mahallada kriminogen vaziyatni chuqur tahlil qilish, profilaktik tadbirlar samaradorligini oshirish hamda belgilangan vazifalarning soʻzsiz ijrosini taʼminlash yuzasidan masʼul rahbarlarga aniq topshiriqlar berildi.
IIV JXD Axborot xizmati