Ichki ishlar vazirligi rahbariyati tomonidan Transport va turizm obyektlarida xavfsizlikni taʼminlash departamentida joriy yilning oʻtgan 6 oy yakunlari boʻyicha sarhisob yigʻilishi boʻlib oʻtdi
2026-07-20 17:40:00 / Yangiliklar
Vazir oʻrinbosari, general-mayor Baxodir Mirzarahimov boshchiligida Transport va turizm obyektlarida xavfsizlikni taʼminlash departamentida 2026-yilning oʻtgan olti oyi yakunlariga bagʻishlangan kengaytirilgan yigʻilish boʻlib oʻtdi.
Yigʻilishda departament hamda uning hududiy boʻlinmalari tomonidan joriy yilning birinchi yarim yilligi davomida amalga oshirilgan xizmat faoliyati atroflicha tahlil qilinib, erishilgan natijalar va yoʻl qoʻyilgan kamchiliklar tanqidiy muhokama etildi. Shuningdek, transport infratuzilmasi va turizm obyektlarida jamoat xavfsizligini taʼminlash, huquqbuzarlik va jinoyatlarning oldini olish, zamonaviy axborot texnologiyalaridan samarali foydalanish hamda xizmat intizomini yanada mustahkamlash boʻyicha ustuvor vazifalar belgilab olindi.
Yigʻilish doirasida mamlakatimiz boʻylab amalga oshirilayotgan “Xavfsiz va sogʻlom yurt“ keng qamrovli profilaktik tadbiri doirasida bajarilayotgan ishlar ham alohida koʻrib chiqildi. Unda transport va turizm obyektlarida fuqarolar hamda xorijiy mehmonlar xavfsizligini taʼminlash, huquqbuzarliklarni barvaqt aniqlash va oldini olish, profilaktik tadbirlar samaradorligini oshirish, mutasaddi idoralar bilan hamkorlikni kuchaytirish yuzasidan aniq topshiriqlar berildi.
Yigʻilish yakunida vazir oʻrinbosari general-mayor Baxodir Mirzarahimov tomonidan kelgusi davrda xizmat faoliyati samaradorligini yanada oshirish, aholi va sayyohlar xavfsizligini taʼminlash borasidagi vazifalar ijrosini soʻzsiz taʼminlash, har bir xodimning masʼuliyatini kuchaytirish yuzasidan tegishli koʻrsatmalar berildi.
Shuningdek, yigʻilish davomida xizmat faoliyatida yuqori natijalarga erishgan bir guruh xodimlarga navbatdagi maxsus unvonlar tantanali ravishda topshirildi. Koʻp yillik samarali xizmati, kasbiga sadoqati va tizim rivojiga qoʻshgan munosib hissasi uchun nafaqaga kuzatilayotgan xodimlarga samimiy minnatdorlik bildirilib, ularga esdalik sovgʻalari topshirildi hamda kelgusi hayotlarida muvaffaqiyat va sihat-salomatlik tilab kuzatildi.
Transport va turizm obyektlarida xavfsizlikni taʼminlash Departamenti Axborot guruhi