O‘zbеkiston Rеspublikаsi Ichki ishlаr vаzirligi

Oʻzbekiston Respublikasi Ichki ishlar vazirligi hamda Oʻzbekiston Respublikasi Advokatlar palatasi oʻrtasida Hamkorlik toʻgʻrisidagi memorandum imzolandi.

Imzolash marosimida Oʻzbekiston Respublikasi ichki ishlar vaziri oʻrinbosari Rustam Mirzayev, Oʻzbekiston Respublikasi Advokatlar palatasi raisi Shuhrat Sadikov, har ikki tomon vakillari hamda ommaviy axborot vositalari vakillari ishtirok etdi.

Tadbir davomida korrupsiyaning oldini olishning zamonaviy tizimi nafaqat sodir etilgan huquqbuzarliklarni aniqlashga, balki, eng avvalo, ularning kelib chiqishiga sabab boʻlayotgan omillar va shart-sharoitlarni oʻz vaqtida bartaraf etishga qaratilgan boʻlishi lozimligi taʼkidlandi.

Shu bilan birga, mazkur vazifani faqat davlat ichki nazorati mexanizmlari orqali hal etish imkoni mavjud emasligi qayd etildi. Bu borada qonunchilikni amalda qoʻllash jarayonida har kuni ishtirok etadigan, mavjud muammolarni koʻradigan hamda ularni hal etish boʻyicha amaliy takliflar bera oladigan professional hamjamiyatning ishtiroki alohida ahamiyatga ega ekani taʼkidlandi.

Ana shu maqsadda Ichki ishlar vazirligi va Advokatlar palatasi doimiy faoliyat yurituvchi professional hamkorlik maydonini tashkil etishga kelishib oldi.

Memorandum doirasida tomonlar huquqni qoʻllash amaliyotining dolzarb masalalarini birgalikda tahlil qiladi, korrupsiyaviy xavf-xatarlarni keltirib chiqarayotgan tizimli sabablarni aniqlaydi, ularni bartaraf etish boʻyicha takliflar ishlab chiqadi, qonunchilikni takomillashtirishga oid tashabbuslarni muhokama qiladi, qoʻshma seminarlar, oʻquv tadbirlari, ilmiy-amaliy konferensiyalar tashkil etadi hamda ilgʻor kasbiy tajriba almashadi va boshqa hamkorlik tadbirlarini amalga oshiradi.

Alohida eʼtibor qonuniylikni taʼminlash, fuqarolarning huquq va erkinliklariga rioya etish, ichki ishlar organlari xodimlarining huquqiy madaniyatini yuksaltirish hamda korrupsiyaning oldini olishga doir yagona yondashuvlarni shakllantirish masalalariga qaratiladi.

Memorandumning imzolanishi davlat organi va mustaqil professional hamjamiyat oʻrtasida konstruktiv hamkorlikni yanada rivojlantirish yoʻlidagi muhim qadam ekani qayd etildi. Bunday hamkorlik tizimli muammolarni oʻz vaqtida aniqlash, yanada samarali tashkiliy va huquqiy qarorlar qabul qilish, shuningdek, ichki ishlar organlari faoliyatining ochiqligi va shaffofligini yanada oshirishga xizmat qiladi.

Shu bilan birga, Memorandumni amalga oshirish jarayoni qonunchilik talablari, har bir tomonning vakolatlari hamda mustaqilligiga qatʼiy rioya qilingan holda amalga oshiriladi.

Hamkorlikning pirovard maqsadi qonuniylikni mustahkamlash, korrupsiya profilaktikasi samaradorligini oshirish, fuqarolarning huquq va qonuniy manfaatlarini ishonchli himoya qilish, shuningdek, jamiyatning ichki ishlar organlari hamda advokatura institutiga boʻlgan ishonchini yanada mustahkamlashdan iborat.