O‘zbеkiston Rеspublikаsi Ichki ishlаr vаzirligi

Ichki ishlar organlari xodimlari oʻz xizmat faoliyati davomida toʻplagan boy amaliy tajribani axborot texnologiyalari sohasidagi bilim va koʻnikmalar bilan uygʻunlashtirgan holda, tizimga zamonaviy innovatsion yechimlarni tatbiq etmoqdalar.

Xususan, Chiroqchi tumani IIB JXX Huquqbuzarliklar profilaktikasi boʻlinmasi katta inspektori, katta leytenant Oʻrol Abduvaliyev kiberjinoyatlarga qarshi kurashish maqsadida «AslQalqon» mobil ilovasini yaratdi. Ayni paytda ushbu dastur amaliyotga joriy etilib, fuqarolar oʻrtasida keng ommalashtirilmoqda.

«AslQalqon» mobil ilovasi qator muhim qulayliklarga ega. Jumladan, u qurilmaga nomaʼlum va xavfli «apk» formatdagi fayllarni oʻrnatishni cheklaydi. Foydalanuvchi Instagram, Imo hamda Telegram kabi ijtimoiy tarmoqlardan foydalanayotganda, yangi viruslar, zararli havolalar va shubhali guruhlar haqida tezkor ogohlantirish tizimi ishga tushib, tegishli xabarlar yuboriladi. Shuningdek, dastur SMS va qoʻngʻiroq xizmatlaridan foydalanish huquqiga ega boʻlgan ilovalarni tahlil qilib, ularni xavflilik darajasiga koʻra toifalaydi. Ilovaning asosiy sahifasi orqali esa foydalanuvchilar tuman IIB soʻnggi yangiliklari va eʼlonlari bilan muntazam tanishib borishlari mumkin.

Katta leytenant Oʻrol Abduvaliyevning yana bir izlanishi mahsuli — «Tezkor xabarlar» mobil ilovasi boʻldi. Maʼlum bir guruh foydalanuvchilari uchun moʻljallangan mazkur ilova tezkor xabar almashish va muhim ogohlantirishlarni oʻz vaqtida yetkazish imkoniyatini yaratadi. Xususan, mobil ilovadan ichki ishlar organlari xodimlari xizmat faoliyatini samarali tashkil etishda foydalanishi mumkin.

Hozirgi paytda tuman IIB xodimlari ushbu mobil ilova orqali kunlik topshiriqlar, tezkor xabarlar va xizmatga oid maʼlumotlarni zudlik bilan qabul qilib olmoqdalar. Profilaktika inspektorining uyali telefoniga kelib tushgan xabar oʻqilgandan soʻng bu haqda xabar yuborgan rahbar xodimga avtomatik ravishda maʼlumot yetkaziladi.

- Profilaktika inspektorlarining aholi bilan muntazam muloqotda boʻlishini inobatga olib, «Tezkor xabarlar» mobil ilovasiga xizmat intizomiga qatʼiy rioya etish, korrupsiyaning oldini olish va manfaatlar toʻqnashuviga yoʻl qoʻymaslik boʻyicha maxsus ogohlantirish tizimi ham kiritilgan, — deydi katta leytenant Oʻrol Abduvaliyev. — Bu xodimlarning masʼuliyatini oshirish, xizmat intizomi va korrupsiyaga qarshi murosasiz munosabatini mustahkamlashda muhim ahamiyat kasb etadi.

Xulosa oʻrnida aytish mumkinki, soha xodimlarining axborot-kommunikatsiya texnologiyalari sohasidagi tashabbuslari huquq-tartibot tizimini zamon talablari asosida takomillashtirishda muhim omil boʻlmoqda. Raqamli texnologiyalarni faoliyatda keng qoʻllash kelgusida ham jamoat xavfsizligini ishonchli taʼminlash hamda jinoyatchilikning barvaqt oldini olishda yuqori natijalarni berishi shubhasiz.

Sodiq Rahimov, oʻz muxbirimiz. “Postda”
Qashqadaryo viloyati