O‘zbеkiston Rеspublikаsi Ichki ishlаr vаzirligi

Surxondaryo viloyatida aholi tinchligi va xavfsizligini taʼminlash, jinoyatchilik hamda huquqbuzarliklarning barvaqt oldini olishga qaratilgan manzilli oʻrganishlar izchil davom etmoqda.

Surxondaryo viloyati IIB boshligʻi, polkovnik Timur Ismailov boshchiligidagi ishchi guruh tomonidan “Xavfsiz va sogʻlom yurt” keng qamrovli tezkor profilaktik tadbiri doirasida hududlarda amalga oshirilayotgan ishlar, tashkil etilgan shtablar faoliyati hamda jinoyatchilikning oldini olish yuzasidan koʻrilayotgan chora-tadbirlar tanqidiy ruhda oʻrganilmoqda.

Navbatdagi oʻrganish Denov tumanining qizil toifaga kiruvchi “Bogʻi shamol” mahallasida oʻtkazildi. Unda tuman va mahalla “yettiligi” faoliyati atroflicha tahlil qilinib, profilaktika inspektorining xizmat uyida yaratilgan shart-sharoitlar, xizmat hududidagi kriminogen vaziyat, profilaktik tadbirlar samaradorligi hamda mavjud muammolar yuzasidan masʼullar bilan amaliy muloqot oʻtkazildi.

Shuningdek, tuman IIB huzuridagi Qoʻriqlash xizmati xodimlari bilan uchrashuvda xonadon va obyektlarni qoʻriqlash tizimiga keng jalb etish, jinoyatchilikning oldini olish va aholi xavfsizligini yanada mustahkamlash boʻyicha tegishli topshiriq hamda koʻrsatmalar berildi.

Shuningdek, tuman IIBda olib borilayotgan obodonlashtirish va hududdagi binolarni taʼmirlash ishlari bilan ham yaqindan tanishildi.

Shundan soʻng Denov tumani Ichki ishlar boshqarmasida polkovnik Timur Ismailov rahbarligida, viloyat IIB boshligʻi oʻrinbosarlari, sohaviy xizmat rahbarlari, shtab aʼzolari hamda barcha shahar va tuman ichki ishlar organlari rahbarlari videokonferensaloqa orqali ishtirok etgan yigʻilish boʻlib oʻtdi.

Yigʻilishda “Xavfsiz va sogʻlom yurt” shtabi faoliyati atroflicha tahlil qilinib, hududlarni jinoyatdan xoli hududga aylantirish, raqamlashtirish ishlarini jadallashtirish, kiberjinoyatga qarshi kurashish, videokuzatuv tizimlarini kengaytirish, xonadon va obyektlarni Qoʻriqlash xizmatiga jalb etish, shuningdek, oilaviy-maishiy nizolar hamda jinoyatlarning barvaqt oldini olish borasidagi ishlar muhokama qilindi. Masʼullarning axborotlari eshitilib, mavjud kamchiliklarni bartaraf etish hamda ish samaradorligini yanada oshirish yuzasidan aniq vazifalar belgilab berildi.

Shundan soʻng, tuman hududida jamoat tartibini saqlash, fuqarolar va yoʻl harakati xavfsizligini taʼminlash, kriminogen vaziyatni yaxshilash maqsadida tungi xizmatga jalb etilgan xodimlarga tungi yoʻriqnoma ham oʻtkazildi.

Hududlarda jinoyatchilikning barvaqt oldini olish, fuqarolar osoyishtaligi va xavfsizligini taʼminlashga qaratilgan bunday manzilli oʻrganishlar Surxondaryo viloyatining barcha shahar va tumanlarida izchil davom etmoqda.

Tinch va xavfsiz hayot — har bir mahalladagi hamjihatlik, masʼuliyat va tizimli profilaktikaning samarasidir.

Surxondaryo viloyati IIB Axborot xizmati