IIV Malaka oshirish institutida boshlangʻich kasbiy tayyorgarlikni tamomlagan tinglovchilar qasamyod qabul qildi
2026-07-19 10:00:00 / Yangiliklar
Ichki ishlar vazirligi Oʻquv-dala markazida IIV Malaka oshirish institutining boshlangʻich kasbiy tayyorgarlik oʻquv kurslarini muvaffaqiyatli tamomlagan qariyb 590 nafar tinglovchining qasamyod qabul qilish va bitiruviga bagʻishlangan tantanali marosim boʻlib oʻtdi.
Tadbirda institut rahbariyati, kafedra, sikl va boʻlim boshliqlari, professor-oʻqituvchilar, ichki ishlar organlari faxriylari, keng jamoatchilik vakillari, tinglovchilarning ota-onalari hamda ommaviy axborot vositalari xodimlari ishtirok etdilar.
Tantanali marosim Oʻzbekiston Respublikasi Davlat madhiyasi yangrashi bilan boshlandi. Shundan soʻng soʻzga chiqqan masʼullar bitiruvchilarni qutlab, ularning kelgusidagi xizmat faoliyatida Vatan va xalq manfaatlariga sadoqat bilan xizmat qilish, qonun ustuvorligini taʼminlash, fuqarolarning huquq va erkinliklarini ishonchli himoya qilish, yuksak kasbiy mahorat, halollik va masʼuliyat bilan zimmalariga yuklatilgan vazifalarni ado etishlariga ishonch bildirdilar.
Marosimning eng hayajonli va unutilmas lahzalaridan biri tinglovchilarning tantanali ravishda qasamyod qabul qilishi boʻldi. Ular Vatanga, xalqqa va xizmat burchiga sadoqatli boʻlishga qasamyod qilib, ichki ishlar organlari safida xizmat qilish masʼuliyatini zimmalariga oldilar.
Tadbir yakunida bitiruvchilarga kelgusidagi sharafli xizmatlarida ulkan muvaffaqiyatlar tilab, ularning mamlakatimizda tinchlik va osoyishtalikni taʼminlash, jamoat xavfsizligini mustahkamlash hamda qonun ustuvorligini taʼminlash yoʻlida munosib hissa qoʻshishlariga ishonch bildirildi.
IIV Malaka oshirish instituti