Qashqadaryo viloyati IIB rahbariyati tomonidan sunʼiy intellekt va raqamli texnologiyalarga asoslangan innovatsion loyihalar taqdimoti koʻrib chiqildi
2026-07-19 10:00:00 / Yangiliklar
Oʻzbekiston Respublikasi Prezidenti tomonidan belgilangan vazifalar hamda “Raqamli Oʻzbekiston – 2030” strategiyasida nazarda tutilgan maqsadlar ijrosini taʼminlash maqsadida bugungi kunda ichki ishlar organlari faoliyatini toʻliq raqamlashtirish, barcha axborot infratuzilmasini sunʼiy intellekt texnologiyalari asosida yagona tizimga birlashtirish, raqamli texnologiyalar orqali jinoyatlarning barvaqt oldini olish, jamoat xavfsizligini taʼminlash va hududlarni zamonaviy videokuzatuv kameralari bilan qamrab olish boʻyicha keng koʻlamli ishlar amalga oshirilmoqda.
Bu borada davlatimiz rahbari tomonidan belgilab berilgan vazifalar ijrosini taʼminlash maqsadida Qashqadaryo viloyati Ichki ishlar boshqarmasi boshligʻi, polkovnik Abduvohid Ismoilov ishtirokida sunʼiy intellekt va raqamli texnologiyalarni ichki ishlar organlari faoliyatiga tatbiq etishga bagʻishlangan taqdimot oʻtkazildi.
Unda sohaviy xizmatlar tomonidan ishlab chiqilgan innovatsion loyihalar, jumladan, “Aqlli piyodalar oʻtish joyi” loyihasi taqdim qilinib, piyodalar harakatiga qarab avtonom ravishda yoritish hamda haydovchilarni ogohlantirish tizimining ishlash mexanizmi namoyish etildi.
Shuningdek, “Yagona intellektual energiya monitoring platformasi” va “Xavfsiz videoselektor va innovatsion davomat platformasi” ham taqdim etildi. Ushbu tizim profilaktika inspektorlarining geolokatsiya asosida xizmat faoliyatini nazorat qilish, kundalik yigʻilishlarni videoselektor orqali tashkil etish, xizmat intizomini mustahkamlash hamda hududlardagi tezkor vaziyatni doimiy monitoring qilish imkonini beradi.
Viloyat IIB boshligʻi, polkovnik Abduvohid Ismoilov har bir loyiha bilan yaqindan tanishib, ularning amaliy ahamiyatini yuqori baholadi.
Taʼkidlanganidek, mazkur innovatsion yechimlar kelgusida viloyat hududida sodir etilishi mumkin boʻlgan jinoyatlarning oldini barvaqt olish, jamoat xavfsizligini yanada mustahkamlash hamda ichki ishlar organlari faoliyati samaradorligini oshirishga xizmat qiladi.
Qashqadaryo viloyati IIB Axborot xizmati