IIV rahbariyati tomonidan raqamlashtirish va axborot xavfsizligi yoʻnalishidagi ishlar tanqidiy muhokama qilindi
2026-07-19 09:00:00 / Yangiliklar
Ichki ishlar vaziri oʻrinbosari, polkovnik Z.K.Kurbanov huzurida joriy yilning oʻtgan 6 oyi davomida ichki ishlar organlarida raqamlashtirish va axborot xavfsizligi yoʻnalishida amalga oshirilgan ishlar, yoʻl qoʻyilgan kamchiliklar muhokamasi boʻlib oʻtdi.
Videoselektor yigʻilishida IIV Markaziy apparatining sohaviy xizmat rahbarlari, tarkibiy va hududiy ichki ishlar organlari boshliqlari ishtirok etdi.
Yigʻilishda, ichki ishlar organlarida raqamlashtirish borasida bir qator yutuqlarga erishilganligi maʼlumot oʻrnida yetkazildi. Jumladan, “Sifatli davlat boshqaruvi” dasturi (Government Quality Award) doirasida oʻtkazilgan baholash yakunlariga koʻra, Ichki ishlar vazirligi “Davlat xizmatlarini koʻrsatish boʻyicha namunali davlat organi” nominatsiyasi gʻolibi deb topilgan boʻlsa, Respublika va mahalliy ijro etuvchi organlarda raqamli rivojlanish darajasini reyting baholash – Nis.uz tizimida 2026-yilning birinchi yarim yilligi boʻyicha 5-oʻrinni, Axborot va kiberxavfsizlik monitoring tizimi boʻyicha 1-oʻrinni egalladi.
Tizimda yoʻlga qoʻyilgan raqamli ish yurituvini yanada samarali tashkil etish, jarayonda aniqlangan muammolarni oʻz vaqtida tezkorlik bilan bartaraf etish zarurligi taʼkidlandi.
Shu bilan bir qatorda, “Xavfsiz shahar” tizimlari boʻyicha, “Yagona elektron hujjat almashinuvi” dan foydalanish, “Turniket” tizimida uchrayotgan kamchiliklarga alohida toʻxtalib, atroflicha tahlil qilindi.
Videoselektor yigʻilishi davomida masʼullarning hisobot va takliflari tinglanib, qoniqarsiz natijasi qayd etayotgan hudud rahbarlarining xizmat faoliyatiga qatʼiy baho berildi.
Yigʻilish yakuniga koʻra, ichki ishlar organlari tizimidagi barcha yoʻnalishlarni bosqichma-bosqich raqamlashtirish boʻyicha amalga oshirilishi lozim boʻlgan ustuvor vazifalar belgilab olindi.