Mahallalarda xavfsizlik va obodlikni taʼminlash bosh mezon: Ichki ishlar vazirligida oʻtkazilgan navbatdagi yigʻilish, muhim vazifalar ijrosiga qaratildi
2026-07-18 08:00:00 / Yangiliklar
Bugun Oʻzbekiston Respublikasi Ichki ishlar vaziri general-leytenant Aziz Tashpulatov rahbarligida navbatdagi yigʻilish oʻtkazilib, unda sohaviy xizmat va hududiy boʻlinma rahbarlari hamda shaxsiy tarkib ishtirok etdi.
Yigʻilishda birinchi navbatda Prezidentimiz Shavkat Mirziyoyev raisligida mahallalarga yangi muhit olib kirish hamda “mahalla yettiligi” faoliyatini yangicha tashkil qilish boʻyicha ustuvor vazifalar yuzasidan oʻtkazilgan videoselektor yigʻilishida berilgan topshiriqlar ijrosini taʼminlash, “Obodonlashtirish va farovonlik” oyligini tashkil etish hamda ichki ishlar organlarining binolari, profilaktika inspektorlarining xizmat xonalarini obodonlashtirish boʻyicha vazifalar belgilab olindi.
Davlatimiz rahbari tomonidan qayd etilgan mahallalarda jinoyatchilikni jilovlash boʻyicha yaratilgan tizim, ichki koʻchalarga kuzatuv kameralarining oʻrnatilishi, xavfsiz koʻcha va yoʻlaklar, aholi muammolari ilmiy asosda hal etilishi, oilalarga psixologik yordam koʻrsatishni yanada takomillashtirish zarurligi taʼkidlandi. Bu borada, jinoyatchilikni jilovlashga masʼul ilmiy tashkilotlar bilan birga namunali mahallalar tajribasi asosida metodika ishlab chiqish, “qizil” va “sariq” toifadagi mahallalar profilaktika inspektorlarini joyiga borib, ushbu metodika asosida oʻqitish rejalari muhokama qilindi.
Hududlarda profilaktika inspektorlarini yonkameralar bilan taʼminlash, ijobiy natijaga erishgan viloyatlar tajribasini keng qoʻllash orqali fuqarolar shaxsini aniqlash, maʼmuriy bayonnoma toʻldirish va sudga material yuborish tizimini avtomatlashtirish boʻyicha masʼullar oldiga vazifalar belgilandi.
Shuningdek, mamlakatimiz miqyosida oʻtkazilayotgan “Xavfsiz va sogʻlom yurt” keng koʻlamli tezkor profilaktik tadbirlarining 15 kunida amalga oshirilgan ishlar va yoʻl qoʻyilgan kamchiliklar muhokama qilindi. Erishilgan natijalar, birinchi navbatda aholi tinchligi va salomatligini taʼminlashga sabab boʻlayotganligini har bir xodim chuqur anglashi va buni butun xalqimiz oʻz turmushida his etishi zarurligi tushuntirildi.
Oylikning ikkinchi yarmida mavjud muammolarni tegishli tartibda bartaraf etish, oʻtkazilayotgan profilaktik va tezkor-qidiruv tadbirlarning samaradorligini oshirish, daxldor idora va tashkilotlar, huquqni muhofaza qilish organlari bilan hamkorlikni yanada mustahkamlash, ayniqsa mahalla yettiligi bilan hamjihatlikda ish olib borish boʻyicha topshiriqlar berilib, ijrosi nazoratga olindi.
Tizimni raqamlashtirish, hujjatlar aylanmasini toʻliq elektron shaklda olib borish boʻyicha belgilangan chora-tadbirlar ijrosi ham yigʻilish davomida koʻrib chiqildi.
Bu yoʻnalishda yoʻl qoʻyilayotgan kamchiliklarni bartaraf etish, xodimlarning xizmat faoliyati davomida “qogʻozsiz bir kun” aksiyalarini koʻpaytirish va amalga oshirilayotgan texnik loyihalarni yakuniga yetkazish zarurligi taʼkidlandi.
Kun tartibidagi masalalardan tashqari, ichki ishlar vaziri tomonidan shaxsiy tarkib oʻrtasida qonuniylikka toʻliq amal qilgan holda xizmat tashkil etish, fuqarolardan kelib tushayotgan har bir murojaat va chaqiruvni puxta oʻrganish va tezlik bilan munosabat bildirish boʻyicha masʼullarga zaruriy topshiriqlar yetkazildi.