O‘zbеkiston Rеspublikаsi Ichki ishlаr vаzirligi

Oʻzbekiston Respublikasi Ichki ishlar vaziri, general-leytenant Aziz Toshpoʻlatov rahbarligidagi ishchi guruh Samarqand viloyatida boʻlib, respublika boʻylab oʻtkazilayotgan “Xavfsiz va sogʻlom yurt” kompleks tezkor-profilaktik tadbirlari oyligining ikkinchi bosqichi doirasida amalga oshirilayotgan ishlar bilan yaqindan tanishdi.

Tashrif davomida jamoat xavfsizligini taʼminlash, huquqbuzarlik va jinoyatchilikning oldini olish, mahallalarda tinch va barqaror muhitni mustahkamlash, profilaktik faoliyat samaradorligini oshirishga qaratilgan chora-tadbirlar har tomonlama oʻrganildi.

Xususan, Urgut tumanidagi dehqon bozorida, aholi gavjum hududlarda xavfsizlikni taʼminlash borasida amalga oshirilayotgan ishlar bilan tanishildi.

Bozorda jamoat tartibini saqlash, yongʻin xavfsizligi talablariga rioya etilishi, videokuzatuv tizimlarining samarali ishlashi, evakuatsiya yoʻlaklarining holati hamda favqulodda vaziyatlarda tezkor harakat qilish imkoniyatlari atroflicha koʻrib chiqildi.

Shu bilan birga, xavfsizlikni taʼminlash tizimining amaliy samaradorligiga alohida eʼtibor qaratildi.

Oʻrganishlar Urgut tumanining Navbogʻ mahallasida davom ettirildi. Bu yerda aholi xavfsizligini taʼminlash, huquqbuzarliklarning barvaqt oldini olish va fuqarolarning huquqiy madaniyatini yuksaltirishga qaratilgan profilaktik hamda targʻibot tadbirlari tahlil qilindi.

Ayniqsa, internet tarmogʻi orqali sodir etilayotgan firibgarliklar, bank kartalari bilan bogʻliq jinoyatlar va boshqa kiberjinoyatlardan aholini ogohlantirishga qaratilgan tushuntirish ishlarining mazmuni va qamrovi oʻrganildi.

Shuningdek, Qoʻriqlash xizmati tomonidan taklif etilayotgan zamonaviy texnik qoʻriqlash vositalari, raqamli xavfsizlik yechimlari hamda xizmat turlarining imkoniyatlari namoyish etildi.

Mazkur vositalardan samarali foydalanish orqali fuqarolar va mulk xavfsizligini yanada mustahkamlash imkoniyatlariga alohida eʼtibor qaratildi.

Tashrif davomida Urgut tumani ichki ishlar boʻlimi rahbariyati hamda mahalla masʼullarining hududda kriminogen vaziyatni barqaror saqlash, huquqbuzarliklarning sabab va omillarini barvaqt bartaraf etish, profilaktika ishlarini manzilli tashkil etish borasida amalga oshirilayotgan ishlar yuzasidan hisobotlari eshitildi.

Mavjud holat tanqidiy tahlil qilinib, aniqlangan kamchiliklarni bartaraf etish, profilaktik tadbirlarning taʼsirchanligini oshirish va masʼuliyatni kuchaytirish boʻyicha tegishli vazifalar belgilab berildi.

Ichki ishlar vaziri tomonidan ichki ishlar organlari xodimlarining xizmat sharoitlarini yaxshilash, ularning ijtimoiy himoyasini kuchaytirish va sohaning moddiy-texnika bazasini mustahkamlash borasida amalga oshirilayotgan ishlar ham alohida oʻrganildi.

Xususan, Samarqand viloyati IIBsi tasarrufidagi obyektlarda qurilish-montaj ishlarining sifati, muhandislik-kommunikatsiya tarmoqlarining tayyorligi, zamonaviy talablar asosida yaratilayotgan infratuzilma va belgilangan rejalar ijrosi yuzasidan masʼullar bilan muhokamalar oʻtkazildi.

Qurilish ishlarini belgilangan muddatlarda va yuqori sifat darajasida yakunlash, binolarni zamonaviy talablarga javob beradigan jihozlar bilan taʼminlash hamda ularni oʻz vaqtida foydalanishga topshirish boʻyicha masʼullarga aniq vazifa va topshiriqlar berildi.

Respublika miqyosida oʻtkazilayotgan “Xavfsiz va sogʻlom yurt” keng qamrovli tezkor-profilaktik tadbirlari doirasida ishchi guruh Samarqand shahrida tungi vaqtda ichki ishlar organlari kuch va vositalarining xizmat faoliyatini ham oʻrgandi.

Jamoat tartibini saqlash, hamkor idoralar naryadlarining xizmatni tashkil etishi, yoʻl harakati xavfsizligini taʼminlash, aholi gavjum hududlar hamda kriminogen nuqtalarda amalga oshirilayotgan profilaktik ishlar tahlil qilindi.

Xizmatchilarning shayligi, tungi xizmatni tashkil etish samaradorligi, saf boʻlinmalari faoliyati hamda aholi va turistlar uchun 24/7 rejimda faoliyat yurituvchi koʻngilochar maskanlar, umumiy ovqatlanish obyektlari, savdo va xizmat koʻrsatish shaxobchalari joylashgan hududlarda xavfsizlikni taʼminlash boʻyicha yoʻlga qoʻyilgan tartib oʻrganildi.

Jamoat xavfsizligini taʼminlash tizimini takomillashtirish va mavjud kamchiliklarni bartaraf etish yuzasidan masʼul rahbarlarga tegishli koʻrsatma va topshiriqlar berildi.