O‘zbеkiston Rеspublikаsi Ichki ishlаr vаzirligi

Qoraqalpogʻiston Respublikasi Ichki ishlar vaziri hamda respublika prokurori ishtirokida Nukus shahrida yuz bergan ogʻir oqibatli jinoyatlar yuzasidan tanqidiy-tahliliy yigʻilish oʻtkazildi.

Yigʻilishda sodir etilgan har bir jinoyatning kelib chiqish sabab va shart-sharoitlari atroflicha tahlil qilinib, huquqbuzarliklarning barvaqt oldini olish, jamoat xavfsizligini taʼminlash, aholi osoyishtaligini mustahkamlash hamda fuqarolar oʻrtasida huquqiy ong va huquqiy madaniyatni yuksaltirish masalalari muhokama qilindi.

Taʼkidlanganidek, jinoyatchilikka qarshi kurashishda uning oqibatlarini bartaraf etish bilan cheklanib qolmasdan, jinoyatlarni keltirib chiqarayotgan omillar va shart-sharoitlarni barvaqt aniqlash hamda bartaraf etishga alohida eʼtibor qaratish muhim ahamiyatga ega.

Yigʻilish davomida huquqni muhofaza qiluvchi organlar tomonidan amalga oshirilayotgan profilaktik chora-tadbirlar samaradorligi tanqidiy baholanib, mahallalarda kriminogen vaziyatni barqarorlashtirish, profilaktika inspektorlari faoliyatini yanada kuchaytirish, aholi murojaatlari bilan manzilli ishlash va ijtimoiy profilaktika mexanizmlarini takomillashtirish yuzasidan aniq vazifalar belgilab berildi.

Shuningdek, har bir ogʻir va oʻta ogʻir jinoyat boʻyicha qonuniy, xolis va har tomonlama tergov harakatlarini taʼminlash, aybdor shaxslarning javobgarligi muqarrarligini taʼminlash, jinoyatchilikka qarshi kurashishda davlat organlari, fuqarolarning oʻzini oʻzi boshqarish organlari hamda jamoatchilik oʻrtasidagi oʻzaro hamkorlikni yanada mustahkamlash zarurligi taʼkidlandi.

Yigʻilish yakunida masʼul rahbarlarga jinoyatchilikning barvaqt oldini olish, huquqbuzarliklarning sabab va shart-sharoitlarini bartaraf etish, profilaktik tadbirlar samaradorligini oshirish hamda aholi xavfsizligini taʼminlashga qaratilgan ustuvor vazifalar yuzasidan tegishli topshiriqlar berildi.

Qoraqalpogʻiston Respublikasi IIV Axborot xizmati