O‘zbеkiston Rеspublikаsi Ichki ishlаr vаzirligi

Xavfsiz muhitni shakllantirish boʻyicha “poytaxt namunasi”ning keng joriy qilingani mahallalarning kriminogen vaziyatiga ijobiy taʼsir koʻrsatmoqda.

Ichki ishlar vazirligi akademiyasi boshligʻi Rustam Xatamov Chilonzor tumanidagi mahallalarda boʻlib, yangi tizim asosida erishilayotgan natijalar bilan tanishdi.

“Botirma” hamda “Mehirjon” mahallalarini oʻrganish chogʻida aholi osoyishtaligini taʼminlash, jinoyatchilikni keskin kamaytirish, fuqarolar murojaatlari bilan ishlash, hududlarni kameralashtirish va boshqa yoʻnalishdagi chora-tadbirlar muhokama qilindi.

Akademiya boshligʻi amaliyotga tatbiq qilingan yondashuv samarasida jinoyatchilik oqibatlari bilan kurashishdan, uning asl omillarini bartaraf etishga qaratilgan samarali tizim yaratilgani, mahallalarning kriminogen vaziyatini barqarorlashtirishda aholi muammolarini oʻz vaqtida bartaraf etish, ijtimoiy profilaktikani kuchaytirish, yoshlar oʻrtasida profilaktik ishlar natijadorligini oshirish muhimligini taʼkidladi.

Manzilli oʻrganishlar davomida qayd etilayotgan huquqbuzarliklarning sabablari, ularga imkon yaratayotgan shart-sharoitlar, aholini qiynayotgan ijtimoiy-maishiy masalalar masʼul rahbarlar, “mahalla yettiligi” vakillari va akademiya professor-oʻqituvchilari bilan birgalikda atroflicha tahlil qilindi.

Shuningdek “Xavfsiz va sogʻlom yurt” kompleks tezkor-profilaktik tadbirlar oyligi doirasida amalga oshirilayotgan ishlar muhokama qilindi.

Akademiya boshligʻi hududlarni texnik qoʻriqlovga olishni jadallashtirish, aholi murojaatlariga oʻz vaqtida munosabat bildirish, yoshlar, ayollar va alohida toifadagi shaxslar bilan manzilli chora-tadbirlari amalga oshirish, oilaviy nizolarni hal qilish, huquqbuzarliklar omillarini barvaqt aniqlash, kriminogen vaziyati murakkab hududlarga qoʻshimcha kuch va vositalarni yoʻnaltirish borasida topshiriq berdi.

Oʻrganishlar yakunida har bir yoʻnalish boʻyicha kechiktirib boʻlmaydigan dolzarb vazifalar belgilab olindi.

IIV Akademiyasi Axborot xizmati