O‘zbеkiston Rеspublikаsi Ichki ishlаr vаzirligi

Joriy yilning 14-iyul kuni Xorazm viloyati Ichki ishlar boshqarmasida joriy yilning oʻtgan olti oyi davomida amalga oshirilgan xizmat faoliyati yakunlariga bagʻishlangan kengaytirilgan hisobot yigʻilishi boʻlib oʻtdi. Davlat madhiyasi ijrosi bilan boshlangan tadbirga Oʻzbekiston Respublikasi Ichki ishlar vazirining oʻrinbosari, general-mayor Baxodir Mirzaraximov raislik qildi.

Yigʻilishda Xorazm viloyati IIB boshligʻi, polkovnik Abdumajid Shermuxamedov, uning oʻrinbosarlari, boshqarmaning sohaviy xizmatlari rahbarlari, masʼul xodimlar, shahar va tuman ichki ishlar organlari boshliqlari hamda ularning oʻrinbosarlari ishtirok etdi. Shuningdek, hududiy boʻlinmalarning boshqa shaxsiy tarkibi videokonferensaloqa tizimi orqali yigʻilish jarayoniga ulandi.

Yigʻilish kun tartibidan joriy yilning birinchi yarim yilligida viloyatda jamoat xavfsizligini taʼminlash, jinoyatchilik va huquqbuzarliklarning barvaqt oldini olish, huquq-tartibotni mustahkamlash, aholi bilan manzilli ishlash, shuningdek ichki ishlar organlarida xizmat intizomi va qonuniylikni taʼminlash borasida amalga oshirilgan ishlar tahlili oʻrin oldi.

Kun tartibidagi asosiy masalalar yuzasidan viloyat IIB boshligʻining birinchi oʻrinbosari, polkovnik Ilhom Tillayev maʼruza qilib, oʻtgan olti oy davomida amalga oshirilgan tezkor-qidiruv, profilaktik va tashkiliy chora-tadbirlar, ularning natijadorligi hamda xizmat faoliyatida yoʻl qoʻyilgan kamchiliklar va ularning kelib chiqish sabablarini atroflicha tahlil qildi.

Shu bilan birga, mavjud muammolarni bartaraf etish va ish samaradorligini oshirish yuzasidan taklif va tavsiyalar bildirildi.

Tanqidiy va tahliliy ruhda oʻtgan yigʻilishda xizmat faoliyatida kamchiliklarga yoʻl qoʻygan sohaviy xizmatlar hamda hududiy ichki ishlar organlari rahbarlarining hisobotlari eshitildi.

Har bir yoʻnalish kesimida aniqlangan muammolar yuzasidan masʼullarga qatʼiy topshiriqlar berilib, ularni bartaraf etish, xizmat samaradorligini oshirish, ijro intizomini mustahkamlash va aholi murojaatlari bilan ishlash sifatini yanada yaxshilash boʻyicha aniq vazifalar belgilab olindi.

Yigʻilishda soʻz olgan Xorazm viloyati IIB boshligʻi, polkovnik Abdumajid Shermuxamedov oʻtgan olti oy davomida aniqlangan kamchiliklar chuqur tahlil qilinib, ularni bartaraf etishga qaratilgan kompleks chora-tadbirlar rejasi ishlab chiqilganini taʼkidladi.

U har bir rahbar va xodim oʻz xizmat vazifasiga yuksak masʼuliyat bilan yondashishi, qonun ustuvorligini taʼminlash, xalq manfaatlariga sidqidildan xizmat qilish va fuqarolarning ichki ishlar organlariga boʻlgan ishonchini yanada mustahkamlash yoʻlida bor kuch va imkoniyatlarini safarbar etishi zarurligini qayd etdi.

Yigʻilish yakunida Ichki ishlar vazirining oʻrinbosari, general-mayor Baxodir Mirzaraximov Xorazm viloyati ichki ishlar organlari tomonidan joriy yilning oʻtgan olti oyi davomida qator ijobiy natijalarga erishilganini eʼtirof etdi.

Shu bilan birga, mavjud kamchiliklarni bartaraf etish, xizmat faoliyatiga zamonaviy boshqaruv va nazorat mexanizmlarini keng joriy etish, profilaktika ishlari samaradorligini yanada oshirish, har bir xodimning shaxsiy masʼuliyatini kuchaytirish yuzasidan aniq vazifalar belgilab berdi.

Shuningdek, vazir oʻrinbosari har bir ichki ishlar organi xodimi Ona Vatan va Prezidentga sadoqat bilan xizmat qilishi, xalq manfaatlarini himoya qilishni oʻzining eng ustuvor burchi deb bilishi hamda kundalik fidokorona mehnati bilan egallab turgan lavozimiga munosibligini amalda namoyon etishi lozimligini alohida taʼkidladi.

Hisobot yigʻilishi davomida muhokama qilingan masalalar yuzasidan tegishli qarorlar qabul qilinib, kelgusi faoliyatning ustuvor yoʻnalishlari belgilab olindi.

Mazkur yigʻilish tizimda xizmat samaradorligini yanada oshirish, ijro intizomini mustahkamlash, huquqbuzarliklar profilaktikasini kuchaytirish hamda aholi tinchligi va xavfsizligini taʼminlashga qaratilgan ishlar samaradorligini yangi bosqichga olib chiqishda muhim ahamiyat kasb etdi.

Xorazm viloyati IIB Axborot xizmati