IIV Akademiyasida xalqaro tajriba asosida kadrlar tayyorlash tizimi takomillashmoqda
2026-07-15 09:00:00 / Yangiliklar
IIV Akademiyasida kadrlar tayyorlashning sifat jihatdan yangi tizimi joriy qilingani taʼlim oluvchilar uchun ilgʻor xorijiy tajribalarni oʻrganishga keng yoʻl ochmoqda.
Yaqinda magistraturaning “tashkiliy-taktik boshqaruv” va “tashkiliy-strategik boshqaruv” mutaxassisliklarida taʼlim olayotgan tinglovchilar Xitoy davlatida boʻlib, zamonaviy boshqaruvga oid bilim va koʻnikmalarini oshirib qaytdilar.
Xorij safari davomida vakillarimiz uchun Xitoy jamoat xavfsizligi universitetida politsiya tuzilmalarini boshqarish, terrorizm, ekstremizm, kiber va narkojinoyatlarga qarshi samarali kurashish, ommaviy tadbirlarda kuch va vositalarni muvofiqlashtirish, faoliyatga raqamli texonologiyalar va boshqaruvning innovatsion modellarini joriy qilish hamda boshqa dolzarb yoʻnalishlarda interfaol mashgʻulotlar tashkil qilindi.
Shu bilan birga, tinglovchilar poytaxt Pekin hamda Shanxay shaharlari politsiya idoralarida jamoat xavfsizligini taʼminlash, kriminogen vaziyatni tahlil qilish, jinoyatlarni tezkorlik bilan fosh etish, sudga qadar ish yurituvida protsessual harakatlar samaradorligini oshirish, zamonaviy texnologiyalar va sunʼiy intellekt imkoniyatlaridan oqilona foydalanish maqsadida yoʻlga qoʻyilgan ilgʻor jihatlarni oʻrgandilar. Mahalliy mutaxassislar bilan sohadagi tendensiyalar yuzasidan fikr almashdilar.
Oʻquv kursi yakunlari boʻyicha oʻtkazilgan tadbirda Jamoat xavfsizligi universiteti vitse-prezidenti Liu Dong Hua oʻzaro hamkorlik memorandumi tajriba almashinuvini kengaytirish, kadrlar malakasini oshirish va ikki mamlakat oʻrtasida doʻstona aloqalarni mustahkamlashda muhim ahamiyat kasb etayotganini taʼkidlab, tinglovchilarga sertifikatlarni topshirdi.
IIV Akademiyasi Axborot xizmati